Гвинеяда исёнчилар бутун мамлакат бўйлаб комендантлик соати эълон қилди

Ғарбий Африкада жойлашган Гвинея Республикасида 5 сентябрь куни давлат тўнтариши уюштирган ҳарбий исёнчилар эндиликда бутун мамлакат бўйлаб 20:00 дан кейин комендантлик соати жорий этилганини эълон қилди. Бу ҳақда France Press агентлигига таяниб, «ТАСС» хабар берди.

Агентлик маълумотига кўра, исёнчилар ушбу чора «кейинги билдиришномага қадар» амалда бўлишини айтган. Шунингдек, улар ҳудудлардаги губернаторлар ва раҳбарлар ўз ўрнини ҳарбийларга бўшатиб беришини маълум қилган.

5 сентябрь куни кечқурун Гвинея миллий телевидениесида эълон қилинган иккинчи баёнотга кўра, исёнчи ҳарбийлар вазирлар ва муассасалар раҳбарларини 6 сентябрь куни маҳаллий вақт билан 11:00 (Тошкент вақти билан 16:00) пойтахт Конакрида бўладиган йиғилишга чақирган.

Шунингдек, ушбу баёнотда Гвинея ҳарбийлари томонидан тузилган Бирлашиш ва тараққиёт миллий қўмитаси тинч аҳоли ва уларнинг мол-мулки хавфсизлигини таъминлаш чораларини кўришга ваъда берди.

«Фуқароларнинг хавфсизлиги, шунингдек, уларнинг мол-мулки хавфсизлигини таъминлаш учун барча чоралар кўрилади», — дейилади ҳужжатда. Қўмита раҳбари, полковник Мамади Думбуя «йўл назоратчилари ва полиция ходимларига қоидаларга амал қилишни таъминлашни» буюрди.

«Биз миллий ва халқаро ҳамжамиятни ишонтириб айтамизки, собиқ президентнинг (Альфа Конде) жисмоний ва руҳий саломатлигига таъсир ўтказилмайди. Биз унинг тиббий хизматлардан фойдаланишини ва шифокорлари билан алоқада бўлишини таъминлаш учун барча чораларни кўрдик », — дея таъкидланади қўмита баёнотида.

Гвинеяда 5 сентябрь, якшанба куни эрталаб президент Альфа Конде қароргоҳи яқинида отишма юз берди.

Jeune Afrique маълумотларига кўра, полковник Мамади Думбуя раҳбарлигидаги GPS махсус топшириқли бўлинма жангчилари ўт очган. Reuters’га хабар берган гувоҳлар сўзларига кўра, ҳарбийлар мамлакат пойтахти Конакри кўчаларида патруллик қилмоқда. Шунингдек, агентлик манбаси маълум қилишича, президент қароргоҳи ва бир нечта вазирликлар бинолари жойлашган туманга олиб борадиган ягона кўприк ҳарбийлар томонидан тўсиб қўйилган.

Президент Альфа Конде жабр кўрмаган, дея агентликка юқори мансабли амалдор маълум қилган, аммо бошқа тафсилотларни ошкор қилмаган. Кейинроқ президент Альфа Конде давлат тўнтариши уюштирган бир гуруҳ ҳарбийлар томонидан қўлга олингани ҳақида хабар берилди.

Қўзғолончилар етакчиси полковник Мамади Думбуя мамлакатда конституция амал қилишдан тўхтаганини ва чегаралар ёпилганини эълон қилди.