Жаҳон соғлиқни сақлаш ташкилоти (ЖССТ) маълумотларига кўра, дунёда коронавирусга чалинганлар сони 131 миллион кишидан ошди, шуларнинг 2,85 миллиони вафот этди. Жонс Ҳопкинс университети маълумотлари бўйича эса, бутун дунёда коронавирус билан касалланганлар сони 131,8 миллион кишидан ошган, 2,86 миллиондан зиёди вафот этган.
Вирусни юқтирганлар сони бўйича АҚШ етакчи бўлиб қолмоқда, у ерда 30,7 миллион кишида вирус аниқланган. Бразилия иккинчи (13 миллион), Ҳиндистон учинчи (12,6 миллион) ўринда бормоқда. Франция (4,8 миллион), Россия (4,5 миллион) ва Буюк Британия (4,3 миллион) тегишли равишда тўртинчи, бешинчи ва олтинчи ўринларни эгаллади.
Дунёда асосий вакцина ишлаб чиқарувчилари ва харидорлари кимлар?
АҚШнинг Дюк университети мутахассислари ҳисоб-китобларига кўра, дунё мамлакатлари COVID-19’га қарши жами 8,6 миллиард доза вакцина етказиб бериш бўйича шартномалар тузган. Улар орасида энг оммабопи — AstraZeneca компанияси вакцинаси бўлиб, бутун дунёда 2,4 миллиард дозада олдиндан буюртма қилинган. Иккинчи ўринда — 1,5 миллиард доза кўрсаткич билан Pfizer вакцинаси. Экспертлар ҳисоб-китоблари бўйича, Россиянинг «Спутник V» вакцинаси бозорга 303 миллион, Хитойнинг Sinovac вакцинаси эса 480 миллион дозада етказиб берилади.Бундан ташқари, жами вакциналарнинг 4,6 миллиард дозаси ёки 53 фоизи юқори даромадли мамлакатлар (Жаҳон банки классификацияси бўйича, ЯИМ аҳоли бошига 12,5 минг доллардан кўп бўлган мамлакатлар киради, масалан, АҚШ, Евроиттифоқ, Буюк Британия, Гонконг). Вакцина харидларининг 17 фоизи ўртачадан юқори даромадли мамлакатлар (ЯИМ аҳоли бошига 4—12 минг доллар — Хитой, Бразилия, Беларусь), 16 фоизи эса ўртачадан паст даромадли мамлакатларга (1—4 минг доллар — Индонезия, Непал ва бошқалар) тўғри келади. Қолган улуши эса COVAX механизми орқали вакцина харидларига тегишлидир.
2021 йилда жами 12 миллиард доза вакцина ишлаб чиқарилиши кутилмоқда. Ҳозирча фақат 8,6 миллиард доза учун шартномалар тузилган. Энг кўп вакцина Евроиттифоқ (1,8 миллиард доза), АҚШ (1,2 миллиард), Африка иттифоқи (680 миллион доза), Буюк Британия (457 миллион) ва Бразилия (370 миллион) буюртма қилган.
Мавзуга доир: «Бой давлатлар коронавирусга қарши вакциналарнинг 60 фоизини сотиб олган» — Хитой ташқи ишлар вазири
АҚШда коронавируснинг қўшмутацияли «ҳиндча» штамми аниқланди
АҚШда коронавируснинг дастлаб Ҳиндистонда аниқланган қўшалоқ мутацияли янги штаммини юқтириб олиш билан боғлиқ биринчи ҳолат аниқланди. Бу ҳақда Стэнфорд клиник вирусология лабораторияси мутахассислари маълум қилди. Янги штамм Сан-Франциско кўрфази ҳудудида яшайдиган фуқарода қайд этилган. Коронавируснинг «ҳиндча» штаммига чалинишда гумон қилинаётган яна етти киши текширилмоқда.Ҳиндистонда коронавируснинг икки марта мутацияга учраган янги штамми аниқлангани ҳақида март охирида маълум бўлган эди.
Мавзуга доир: Ҳиндистонда коронавируснинг қўшмутацияли тури аниқланди
Ҳиндистон пойтахтида комендантлик соати жорий қилинди
Ҳиндистон пойтахти Ню-Делида коронавирус билан касалланиш даражасининг ўсишига қарши курашиш учун тунги комендантлик соати жорий қилинди. У ҳар куни 22:00 дан 5:00 гача амал қилади. Бу вақт оралиғида ресторанлар ва паблар ишламайди, тўйлар ва бошқа оммавий тадбирлар ўтказилмайди.Тунги вақтда фақат яшаш учун муҳим маҳсулотлар билан савдо қилувчи дўконлар ва дорихоналар ишлаши мумкин. Икки кишидан кўп одамнинг гуруҳ бўлиб тўпланиши тақиқланади.
Ҳиндистонда 4 апрель куни COVID-19 юқтириш бўйича 103 мингдан ортиқ янги ҳолат қайд этилди. Таъкидланишича, суткалик юқтиришнинг бу қадар юқори кўрсаткичи 2020 йилнинг сентябридан бери биринчи марта кузатилмоқда.
Мавзуга доир: Жанубий Кореяда коронавируснинг тўртинчи тўлқини кутилмоқда, Ҳиндистонда ва Хитойда касалланиш рекорд даражада ўсди
- Буюк Британия бош вазири Борис Жонсон 17 майдан кейин халқаро саёҳатлар тикланишига умид билдирди. Шу билан бирга, у COVID-19’нинг мамлакат ҳудудига олиб кирилиши билан боғлиқ хавфларни ҳам эслатди. Бундан ташқари, бош вазир бошқа мамлакатлар халқаро сафарлар соҳасида COVID-паспортлар жорий қилаётганини ва Британия ҳам «буни ҳал қилиши» кераклигини айтди.
- Грузия бош вазири Ираклий Гарибашвилида коронавирус аниқланди. Мамлакат ҳукумати тақдим этган хабарга кўра, бош вазир ўзини яхши ҳис қилмоқда ва яккаланиш режимида масофадан ишламоқда.
Изоҳ (0)