Дунёда коронавирусга чалинганлар сони 179 171 152 кишига етди, шуларнинг 3 882 709 нафари вафот этган. Касалланиш ҳолатларининг кўплиги бўйича АҚШ (33,5 миллион киши), Ҳиндистон (30 миллион), Бразилия (18 миллион), Франция (5,8 миллион) ва Туркия (5,3 миллион) етакчилик қилмоқда.
Меркель AstraZeneca ўрнига Moderna вакцинасининг иккинчи дозаси билан эмланди
Германия канцлери Ангела Меркель коронавирусга қарши вакцинанинг иккинчи дозасини олди, аммо Moderna компанияси вакцинаси билан эмланди, биринчи укол учун эса унга AstraZeneca вакцинаси қўлланилган эди.Вакцинанинг биринчи дозасини Меркель 16 апрелдаёқ олган эди. Иккинчи доза учун бошқа вакцинадан фойдаланиш қарори Роберт Кох номидаги вирусология институтининг вакцинация бўйича доимий қўмитаси AstraZeneca вакцинасини 60 ёшдан ошганлар учун тавсия этмагани билан боғлиқ, биринчи дозани олишга улгурганларга эса, Moderna вакцинасига ўтишни маслаҳат беришди.
Шунингдек, аввалроқ ўтказилган тадқиқотлар шуни кўрсатдики, AstraZeneca вакцинасининг бошқа вакциналар билан аралаштирилиши битта компания дориси билан иккита дозада эмланишдан кўра самаралироқ бўлиши мумкин.
Германияда 67 миллион доза вакцина қўлланилган, аҳолининг 42,5 миллиони камида бир дозада эмланган.
Мавзуга доир: Ангела Меркель AstraZeneca вакцинаси билан эмланди
Португалия пандемиянинг тўртинчи тўлқинидан хавфсирамоқда
«Дельта» штамми туфайли, Португалияда коронавирус пандемиясининг тўртинчи тўлқини юз беришидан хавотир олишмоқда, сўнгги кунларда COVID-19’га чалиниш бўйича янги ҳолатларнинг 60 фоизини айнан шу штамм ташкил қилмоқда.Мамлакат соғлиқни сақлаш вазирлиги маълумотларига қараганда, Лиссабон ва унинг атрофларида «дельта» штамми устунлик қилмоқда, аммо унинг бошқа ҳудудларга тарқалиб кетишига йўл қўймаслик учун ҳукумат ҳаракат қилмоқда. Хусусан, ўтган дам олиш кунлари Лиссабон кириб-чиқувчилар учун тўлиқ ёпиб қўйилди.
Лиссабон Португалияда баъзи чеклов чоралари ҳалигача амал қилиб келинаётган ягона шаҳар бўлиб қолмоқда.
Айни пайтда Португалиянинг 10 миллион аҳолисидан ярми камида битта дозада, чорак қисми эса тўлиқ эмланган.
Грузияда оғир эпидемиологик вазиятга қарамасдан, комендантлик соати бекор қилинди
1 июлдан бутун Грузия ҳудудида 23:00 дан 05:00 гача амал қилиб келинаётган комендантлик соати бекор қилинади. 23 июндан эса барча фуқаролар учун очиқ жойларда, хусусан, боғ ва кўчаларда ниқоб тақиш мажбурияти бекор қилинди. Биноларда ва транспортда, шунингдек, одамлар кўп тўпланадиган жойларда ҳалиям ниқоб тақишга тўғри келади. Ресторан ва кафелар энди 21:00 эмас, ярим тунгача ишлаши мумкин бўлади.Координация кенгашининг ушбу қарори мутахассисларнинг танқидига учради, чунки Грузия сўнгги бир неча ой ичида коронавирус тарқалиши ва аҳоли сонига нисбатан ўлим даражаси бўйича дунёда биринчи ўринлардан бирига кўтарилган эди. Бундан ташқари, яқинда Тбилисида «дельта» штамми аниқланганди.
Грузиянинг 3,7 миллионлик аҳолисидан 360,4 минги коронавирусга чалинган, бу аҳолининг 10 фоизи демакдир. Аммо фуқароларнинг 4 фоизигина камида битта дозада вакцина олган.
БААда сайёҳларга бепул эмланиш таклиф қилинмоқда
Бирлашган Араб Амирликлари пойтахти Абу-Дабида сайёҳларга коронавирусга қарши бепул эмланиш таклиф қилинмоқда. Бунгача фақат мамлакат фуқаролари ва истиқомат учун гувоҳномага эга бўлган шахсларгина эмланаётган эди.Абу-Даби томонидан виза берилган ҳамда сайёҳлик визаси ҳуқуқини берувчи паспорт эгалари мамлакатга пойтахт орқали кириб келишда бепул COVID-вакциналарни брон қилиб қўйиши мумкин.
Таъкидлаш жоиз, мамлакатда аҳолининг 85 фоизи камида битта дозада вакцина олишга улгурган.
Изоҳ (0)