Туниснинг бир қатор йирик шаҳарларида ва пойтахт Тунисда 26 июль куни бўлиб ўтган намойишлардан кейин комендантлик соати ўрнатилди. Бу ҳақда Al-Jazeera телеканали хабар берди.
Тартибсизликлар мамлакат президенти Каис Саид парламент фаолияти 30 кунга тўхтатилгани ҳамда бош вазир Ҳишем ал-Мешиши истеъфога чиқарилгани ҳақида маълум қилгач бошланди. Шунингдек, Мудофаа вазири Иброҳим Бартажи ва Адлия вазири вазифасини бажарувчиси Асна Бен Слиман ҳам лавозимидан озод қилинган.
«Интерфакс» хабарига кўра, АҚШ давлат котиби Энтони Блинкен Тунис президенти Каис Саид билан телефон орқали суҳбатлашган. Суҳбат давомида Блинкен демократояга риоя қилиш ҳамда барча сиёсий кучлар билан мулоқот олиб бориш зарурлигини айтган.
«У президент Саидни Тунисда бошқарувнинг асоси бўлган демократия ва инсон ҳуқуқлари тамойилларига риоя қилишга чақирди. Давлат котиби уни барча сиёсий субъектлар ва Тунис халқи билан очиқ мулоқотни давом эттиришга ундади», — дейилади АҚШ давлат департаменти хабарда.
Блинкен икки мамлакат ўртасида «мустаҳкам шериклик» мавжудлигини таъкидлаб, «АҚШ иқтисодий инқироз ва COVID-19 пандемияси шароитида Тунис халқини қўллаб-қувватлашини» ваъда қилган. Давлат котибининг таъкидлашича, Қўшма Штатлар Тунисдаги воқеалар ривожини кузатишда давом этади.
Изоҳ (0)