Яқин кунларда бир неча вазирлик бинолари “Янги Тошкент” ҳудудига кўчирилади. Бу ҳақда Қурилиш ва уй-жой хўжалиги вазири Шерзод Ҳидоятов маълум қилди дея хабар берди “Дарё” мухбири.
Бугун, 9 июнь куни Тошкент шаҳрида Ўзбекистон—Словакия бизнес форуми ўтказилмоқда. Тадбир доирасида икки давлат ўртасидаги инвестиция масалалари муҳокама қилинмоқда.
Форум доирасида Шерзод Ҳидоятов журналистлар билан суҳбатлашди. Вазир саволларга жавоб қайтарар экан, президентнинг 2024 йил апрелдаги қарорида кўзда тутилган республика ижро этувчи ҳокимият органларини “Янги Тошкент” шаҳри ҳудудига кўчириш масаласига тўхталди.
Ҳукумат расмийсининг айтишича, яқин кунларда учта вазирлик янги ҳудудга кўчирилади.
“ъЯнги Тошкентъда вазирликларнинг вақтинчалик биносини қуриш ишлари кетяпти. Энергетика вазирлиги кўчди. Мана Транспорт, Қурилиш ва Экология вазирликлари ҳам яқин кунларда тўлиқ кўчади. У ерда барча вазирликлар бинолари битта мажмуада, ёнма-ён жойлашади. Дастлаб ҳамма вазирликлар янги бинолари қурилгунича вақтинчалик бинода ъўтириб турадиъ. Эски бинолари эса сотувга қўйилади. Бинолар тадбиркорлар томонидан сотиб олинади. Ундан тушган маблағлар эвазига янги бинолари қурилади. Кейин ўша биноларга кўчиб ўтилади”, деди вазир.
Суҳбат давомида Шерзод Ҳидоятов қолган вазирликлар ҳам босқичма-босқич кўчирилишини таъкидлади.
“Ҳар бир вазирлик кўчирилганда ходимларининг транспортдан фойдаланиш, ҳудудга етиб бориши ҳисобга олинади. У ерга махсус транспорт йўналишлари ташкил қилинади. Транспорт вазирлиги мазкур масалани қандай амалга ошириш бўйича ишламоқда”, дея маълум қилди ҳукумат вакили.
Маълумот учун, 2023 йил март ойида “Янги Тошкент” қурилишига старт берилган. Ҳозирги Тошкент 43 минг гектар ҳудудни эгаллайди.
“Янги Тошкент” лойиҳаси доирасида қўшимча 20 минг гектарда 1 миллион аҳоли яшаши учун қулай шароит яратилиши ва шунга мос инфратузилма барпо этилиши режалаштирилган. Хусусан, биринчи босқичда 60 минг аҳолига мўлжалланган кўп қаватли уйлар, 30 та мактаб, 20 та болалар боғчаси, кўп тармоқли шифохона ва 5 та оилавий поликлиника қурилиши кўзда тутилган.
Расмий хабарга кўра, Янги Ўзбекистон университети, Миллий кутубхонанинг янги бинолари, театр, ижод мактаблари, савдо ва сервис марказлари ҳам шу ерда жойлашади. Босқичма-босқич давлат идоралари ҳам “Янги Тошкент”га кўчиб боради. Уларнинг ҳозирги бинолари ўрнида меҳмонхоналар, хизмат кўрсатиш ва савдо объектлари очилиб, Тошкент замонавий туризм ва бизнес марказига айланади.
Изоҳ (0)