Тошкент ҳокимлигига Қурилиш вазирлиги билан биргаликда 2022 йил охиригача пойтахт бош режасини ишлаб чиқиш ва тасдиқлаш учун киритиш вазифаси топширилди. Мазкур топшириқ Вазирлар Маҳкамасининг 19 ноябрдаги «2021−2024 йилларда Тошкент вилоятидан Тошкент шаҳрига кўчирилаётган аҳоли пунктларини комплекс ривожлантириш ва аҳолига маиший хизмат кўрсатиш соҳасини янада такомиллаштириш чора-тадбирлари тўғрисида»ги қарорида сўз боради.
Бундан ташқари, қарорда шаҳар ҳокимлиги ва Қурилиш вазирлигига давлат мактабгача таълим муассасалари, мактаблар, соғлиқни сақлаш, маданият ва спорт муассасаларини қуриш учун аҳолига қулай бўлган жойлардан текин ер участкалари ёки бинолар ажратиб бериш бўйича тегишли топшириқлар бериб ўтилган.
Ҳужжатга мувофиқ, Тошкент шаҳар ҳокимлиги ва Тошкент вилояти ҳокимлигига манфаатдор вазирликлар ва идоралар билан биргаликда икки ой муддатда Тошкент вилоятининг Зангиота, Юқори Чирчиқ, Ўрта Чирчиқ ва Қибрай туманлари ҳамда Тошкент шаҳрининг Сергели, Бектемир, Мирзо Улуғбек ва Яшнобод туманлари, шунингдек, Тошкент вилояти Тошкент шаҳри чегараларини ўзгартириш билан боғлиқ барча зарур ташкилий-техник тадбирлар амалга ошириши топширилган.
Тошкент ва Тошкент вилояти чегараларини ўзгартириш август ойида Сенат томонидан маъқулланган эди. Киритилган ўзгартиришлар натижасида Тошкент вилоятининг 7853,3 гектар ер майдони Тошкент шаҳрига, пойтахтнинг 171,3 гектар ери Тошкент вилоятига ўтказилмоқда.
Бош режани тайёрлаш муддати бир неча бор қолдирилган эди
«Gazeta.uz»нинг ёзишича, 2012 йил ёзида Тошкент шаҳри ва унинг атрофи бош режасининг 2030 йилгача ҳисобланган техник-иқтисодий асослари муҳокама қилингани ҳақида хабар берилган.
2018 йилнинг августидаги президент фармонида пойтахтнинг тасдиқланган бош режаси мавжуд эмаслиги «тартибсиз қурилишларга олиб келмоқда, тадбиркорлик субъектлари фаолиятини янада кенгайтиришга имкон бермаяпти, шунингдек, пойтахтни фаол ижтимоий-иқтисодий ривожлантиришга тўсқинлик қилмоқда», — дея қайд этилган эди.
2019 йилнинг февраль ойида пойтахт ҳокимининг архитектура, капитал қурилиш ва коммуникацияларни ривожлантириш масалалари бўйича собиқ биринчи ўринбосари Даврон Ҳидоятов (ҳозирги Чирчиқ шаҳар ҳокими) Тошкент шаҳрининг бош режаси концепцияси ўша йилнинг апрелига қадар 3D форматда тайёрланиши ҳақида маълум қилганди. Шунингдек, у лойиҳани яратиш устида Хитой, Туркия ва Буюк Британия компаниялари иш олиб бораётганини қайд этди.
Кейинчалик белгиланган муддатлар ортга сурилди — ишлаб чиқишда турк компанияси иштирок этган ҳужжат 2020 йилда тақдим этилиши режалаштирилаётгани маълум қилинди.
Қурилиш вазирининг собиқ биринчи ўринбосари Шерзод Ҳидоятов (ҳозирги уй-жой коммунал хўжалиги вазири) 2020 йил декабрь ойида Тошкентнинг бош режасини ишлаб чиқиш 2022 йил охиригача якунланиб, аҳолига тақдим этилиши режалаштирилганини маълум қилди. Ушбу муддат ҳукумат томонидан тасдиқланган муддатга мос келади.
Президентнинг 2020 йил ноябрдаги қарори билан 2025 йилгача Ўзбекистоннинг барча шаҳарлари ва шаҳар посёлкаларининг тўртдан бир қисмини бош режалар билан қамраб олиш белгиланган. Бунда лойиҳа ҳужжатлари жамоатчилик муҳокамаси натижаларини ҳисобга олган ҳолда тасдиқланиши лозим.
Изоҳ (0)