Ўзбекистонда уй-жой қурилиш объектларининг 70 фоизи сейсмик барқарор эмаслиги, бу ҳақда Вазирлар Маҳкамасининг қарорида сўз боргани ҳақида хабар берилганди. Қурилиш ва уй-жой коммунал хўжалиги вазирининг биринчи ўринбосари Шерзод Ҳидоятов сейсмик барқарор бўлмаган 70 фоиз қурилиш объектлари бу — аҳоли томонидан қуриб олинган уй-жойлар эканини маълум қилди.
Мен Оммавий ахборот воситалари вакилларидан бу ҳолатни талқин қилишда хато қилмасликни илтимос қиламан, сарлавҳада нотўғри ёзиляпти, хабарнинг ичига кирганда эса тўғри. Масалан, “Дарё” ҳам, бошқа сайтлар ҳам тўғри ёзган. Қарорда якка тартибда қурилган уйлар дейилмоқда, бу нима дегани? Бу одамларнинг ўзи қуриб олган участкалар дегани, — дейди вазирнинг биринчи ўринбосари Шерзод Ҳидоятов тармоқларда тарқалган маълумотларни изоҳлар экан.
Вазир ўринбосарининг таъкидлашича, ўзбекистонликлар ўзи яшаш учун уй қураётган пайтда лойиҳачи билан эмас, қурилишда ишлаган, тажрибаси бор қурувчи маслаҳати билан қуради.
Уйларнинг лойдан ёки ғиштдан кўтарилгани эмас, қурилаётган уйини геология қилмаган, ернинг қаттиқлиги, чўкиш масалалари ўрганилмаган. Имконияти борича, одамларимиз ўзининг топганидан амаллаб участкасини кўтариб олган. Қарорда айнан шу уларнинг зилзилабардошлилиги йўқ, мавҳум деб берилмоқда. Лекин Ўзбекистонда қурилаётган барча кўп қаватли уйлар назоратимиз асосида қурилади. Уларнинг зилзилабардошлилиги текширилган ва талабга жавоб беради. Рухсатсиз қурилган ва текширилмаган уйлар кадастр қилинмайди. Бу дегани — у ерда ҳеч ким яшай олмайди дегани, — дейди масъул.
Вазирлик вакилининг қўшимча қилишича, Ўзбекистонда икки қаватдан (12 метр) юқори бўлган уй-жойлар қурилиши тасдиқланган лойиҳа асосида қурилади ва бу масъуллар назоратида бўлади.
“ЎзшаҳарсозликЛITI” ДУКда бўлим бошлиғи сифатида ишлаб келаётган Шуҳрат Ҳошимовнинг айтишича, Вазирлар Маҳкамаси қарори орқали тарқалган ахборотга ишонч йўқ.
Биноларни техник кўрикдан ўтказмасдан туриб, унинг сейсмик барқарор экани ёки барқарор эмаслиги ҳақида хулоса бериб бўлмайди. Масалан Сизнинг соғлиғингиз ҳақида маълумот олмай туриб, касал ёки соғлиғингиз зўр деёламанми? Сиз шифокорга бориб, диагностикадан ўтканингиздан сўнг соғлиғингизга баҳо беришимиз мумкин. Шунга ўхшаб, бинг бўйича ҳам техник кўрик бўлгач, хулоса қилиш мумкин. Хавотирга ўрин йўқ, — дейди Шуҳрат Ҳошимов.
Шуҳрат Ҳошимовнинг журналистларга тушунтиришича, 70 фоиз қурилиш объектлари, хоҳ у одамларнинг ўзи қурган уй бўлса ҳам, уларни техник кўрикдан ўтказмасдан туриб, шундай маълумот тарқатилган. Бу эса ахборотнинг аниқлигига шубҳа уйғотади.
Рақамлардаги биноларни текшириш учун қанча вақт керак, ўйлаб кўринг, яна бир марта айтаман, текширмасдан туриб, унга баҳо бериб бўлмайди. Бу умуман нотўғри, — дейди у.
Қурилиш ва уй-жой коммунал хўжалиги вазирининг биринчи ўринбосари Шерзод Ҳидоятов Шуҳрат Ҳошимовнинг гапини тўлдирар экан, Вазирлар Маҳкамасининг қароридаги маълумот тахминий ҳисоб-китоблар бўйича олинганини тасдиқлади.
Изоҳ (0)