Туркия 13 июнь куни фуқаролар уруши сабабли Туркияга қочиб ўтган 273 мингдан ортиқ суриялик уйига қайтганини маълум қилган. Бу ҳақда Al Arabiya хабар берди.
“2024 йил 8 декабрдан бери Сурияга ихтиёрий равишда қайтган одамлар сони 273 мингдан ошди”, деди Туркия вице президенти Жевдет Йилмаз.
Ички ишлар вазирлигининг май ойида эълон қилинган маълумотларига кўра, 2,7 миллионга яқин суриялик қочқин ҳали ҳам Туркияда бўлиб турибди.
Суриянинг янги ҳукмдорларини қўллаб-қувватлаётган Туркия ҳукумати мамлакатнинг баъзи қисмларида қочқинларнинг мавжудлиги туфайли юзага келган кескинликни юмшатиш учун уларнинг қайтишини тезлаштиришга умид қилмоқда.
Олдинроқ Туркия Суриянинг марказий қисмида жойлашган Тияс (Т4) ҳарбий-ҳаво базасини назоратга олишга ҳаракат қилгани айтилганди. Анқара бу ерда ҳаво мудофаа тизимларини жойлаштиришни режа қилганди.
Туркия ва Сурия расмийлари 2024 йил декабрдан буён мудофаа шартномаси бўйича музокаралар олиб бораётган эди. Мазкур келишувга биноан турклар мамлакатга ҳарбий ёрдам кўрсатиши, Сурия осмонини муҳофаза қилиши кўзда тутилганди.
Маҳаллий нашрга кўра, Анқара мазкур базага маҳаллий ишлаб чиқарилган Ҳисар ҳаво мудофаа тизимини жойлаштириш орқали ўз қўшинлари хавфсизлигини таъминламоқчилиги айтилган. Кейинчалик у ерга кузатув ва жанговар дронлар ҳам олиб келиниши мумкинлиги билдирилганди.
Бундан ташқари, Туркия ҳудудда кўп ҳалқали ҳаво мудофаа тизимини жорий қилиш орқали турли таҳдидларга, жумладан жанговар самолётлар, дронлар ва ракеталарга қарши кураш имкониятига эга бўлмоқчи эди. Бу эса табиийки Исроилни ташвишга солаётганди.
Изоҳ (0)