Yaqin kunlarda bir necha vazirlik binolari “Yangi Toshkent” hududiga ko‘chiriladi. Bu haqda Qurilish va uy-joy xo‘jaligi vaziri Sherzod Hidoyatov maʼlum qildi deya xabar berdi “Daryo” muxbiri.
Bugun, 9-iyun kuni Toshkent shahrida O‘zbekiston—Slovakiya biznes forumi o‘tkazilmoqda. Tadbir doirasida ikki davlat o‘rtasidagi investitsiya masalalari muhokama qilinmoqda.
Forum doirasida Sherzod Hidoyatov jurnalistlar bilan suhbatlashdi. Vazir savollarga javob qaytarar ekan, prezidentning 2024-yil apreldagi qarorida ko‘zda tutilgan respublika ijro etuvchi hokimiyat organlarini “Yangi Toshkent” shahri hududiga ko‘chirish masalasiga to‘xtaldi.
Hukumat rasmiysining aytishicha, yaqin kunlarda uchta vazirlik yangi hududga ko‘chiriladi.
“‘Yangi Toshkent’da vazirliklarning vaqtinchalik binosini qurish ishlari ketyapti. Energetika vazirligi ko‘chdi. Mana Transport, Qurilish va Ekologiya vazirliklari ham yaqin kunlarda to‘liq ko‘chadi. U yerda barcha vazirliklar binolari bitta majmuada, yonma-yon joylashadi. Dastlab hamma vazirliklar yangi binolari qurilgunicha vaqtinchalik binoda ‘o‘tirib turadi’. Eski binolari esa sotuvga qo‘yiladi. Binolar tadbirkorlar tomonidan sotib olinadi. Undan tushgan mablag‘lar evaziga yangi binolari quriladi. Keyin o‘sha binolarga ko‘chib o‘tiladi”, dedi vazir.
Suhbat davomida Sherzod Hidoyatov qolgan vazirliklar ham bosqichma-bosqich ko‘chirilishini taʼkidladi.
“Har bir vazirlik ko‘chirilganda xodimlarining transportdan foydalanish, hududga yetib borishi hisobga olinadi. U yerga maxsus transport yo‘nalishlari tashkil qilinadi. Transport vazirligi mazkur masalani qanday amalga oshirish bo‘yicha ishlamoqda”, deya maʼlum qildi hukumat vakili.
Maʼlumot uchun, 2023-yil mart oyida “Yangi Toshkent” qurilishiga start berilgan. Hozirgi Toshkent 43 ming gektar hududni egallaydi.
“Yangi Toshkent” loyihasi doirasida qo‘shimcha 20 ming gektarda 1 million aholi yashashi uchun qulay sharoit yaratilishi va shunga mos infratuzilma barpo etilishi rejalashtirilgan. Xususan, birinchi bosqichda 60 ming aholiga mo‘ljallangan ko‘p qavatli uylar, 30 ta maktab, 20 ta bolalar bog‘chasi, ko‘p tarmoqli shifoxona va 5 ta oilaviy poliklinika qurilishi ko‘zda tutilgan.
Rasmiy xabarga ko‘ra, Yangi O‘zbekiston universiteti, Milliy kutubxonaning yangi binolari, teatr, ijod maktablari, savdo va servis markazlari ham shu yerda joylashadi. Bosqichma-bosqich davlat idoralari ham “Yangi Toshkent”ga ko‘chib boradi. Ularning hozirgi binolari o‘rnida mehmonxonalar, xizmat ko‘rsatish va savdo obyektlari ochilib, Toshkent zamonaviy turizm va biznes markaziga aylanadi.
Izoh (0)