Қурилиш ва уй-жой коммунал хўжалиги вазирининг биринчи ўринбосари Шерзод Ҳидоятов биллинг тизими нима учун айнан Навоий вилоятида амалга оширилаётганига изоҳ берди.
Унинг сўзларига кўра, мамлакатда бошқа жойларга нисбатан фақат Навоий вилоятида одамлар тўлови тартибли.
Ўз вақтида тўлаш фоизи — 100 фоиз бўлмаса ҳам юқори. Эксперимент сифатида ушбу вилоятни танлашга сабаб, тўловларнинг юқори қисми ўз вақтида тўланмоқда. Эътирозларни ўрганишда бирданига катта резонанс бўлмаслиги учун ҳам вилоят танланган. Биллинг тизими ишлаб чиқилди. Электр тармоқлари билан интеграция ишларини ҳам тайёрлаб қўйганмиз, — дейди Шерзод Ҳидоятов.
Таъкидланишича, ҳозирда тизимни ишга тушириш учун Энергетика вазирлиги иш олиб бормоқда. Бунинг учун энергетика тўғрисидаги қонунга ўзгартириш киритилиб, депутатлар томонидан маъқулланади, ундан сўнг Сенатга киритилиб, тасдиқлангандан кейин амалга оширилади.
Бу жуда ҳам яхши самара беради деб ўйлайман. Битта кўп қаватли уйда, масалан, 50 та хонадон бўладиган бўлса, 40 та хонадон тўласа ўз вақтида, 10 та хонадон тўламагани учун қолган 40 тасига бу хизматни кўрсатиш жойига қўйилмаса, нима учун хизматдан фойдалана олмасликлари керак? Ҳамма ўз вақтида тўлаши керак деб ўйлайман. Бугунги кунда бу тажрибалар жуда яхши самара берди, — дейди вазир ўринбосари.
Бундан ташқари, Шерзод Ҳидоятов кўп қаватли уйларда яшовчи аҳолига хизмат кўрсатиш ва чиқиндилардан тозалашда тўловлар бўйича кўплаб масалалар юзага келаётганини қайд этган. Тизим шу каби масалаларни бартараф этиш учун ҳам қилинган, дейди у.
Навоийда амалга оширилиши белгиланган тизим кўп қаватли турар жой хонадонларининг газ, электр ва иссиқлик таъминоти, ичимлик ва оқова сув ҳамда чиқиндиларни олиб чиқиш хизматлари учун тўловларни ягона тизимда бирлаштиришни назарда тутади. Сентябргача ягона тизимни ишга тушириш ҳамда мониторинг қилиш имконияти яратилади. Октябрь ойида тизим тажриба-синов тарзида Навоий шаҳрида жорий этилади.
Изоҳ (0)