Ҳадемай янги 2022 йил ҳам кириб келади. Якунланаётган йил қувончли, унутилмас воқеаларга бой бўлди. Афсуски, бу йил ҳам бошқалари сингари кўплаб инсонларни ёруғ дунёдан олиб кетди. Йўқотилган инсонлар орасида санъат ва маданият соҳасида сермаҳсул ижод қилган инсонлар ҳам бисёр. Йил сўнгида уларни ёдга оламиз.
Раҳматжон Қурбонов
Ўзбекистонда хизмат кўрсатган артист Раҳматжон Қурбонов шу йилнинг 17 январида 62 ёшида вафот этди. Унинг ўлимига ҳеч қандай касаллик сабаб бўлмаган. Хонанда 1959 йил 20 сентябрда Хива шаҳрида санъаткор оиласида таваллуд топган.
У Хивадаги Матёқуб Харратов номидаги мусиқа билим юрти ҳамда Ўзбекистон давлат консерваториясининг вокал ва мақом бўлимида ўқиган. Буюк санъат дарғалари — Насим Ҳошимов, Ҳалима Носирова, Саодат Қобуловаларнинг севимли шогирдлари қаторидан жой олган.
Узоқ йиллар Тошкент шаҳрида самарали фаолият юритиб, «Лазги» ансамблига раҳбарлик қилган. Бир неча рисолалар, китоблар, ўқув қўлланмалар муаллифи сифатида ҳам танилган. Раҳматжон Қурбонов ўлимига қадар Ўзбекистон давлат филармонияси Хоразм вилояти бўлинмаси директори вазифасида фаолият юритаётган эди.
Маҳкам Муҳаммедов
Ўзбекистон Республикаси санъат арбоби Маҳкам Муҳаммедов шу йилнинг 4 февраль куни 86 ёшида вафот этди.
Ўзбекистон санъат арбоби Маҳкам Муҳаммедов мамлакатдаги атоқли режиссёрлардан бири сифатида «Азизахон» номли телевизион фильм, «Кўнгил кўчалари», «Меҳробдан чаён» сингари кўплаб илк телесериалларни томошабинлар эътиборига ҳавола этган.
Шунингдек, у Чингиз Айтматовнинг «Оқ кема», халқ ёзувчиси Раҳмат Файзийнинг «Ҳазрати инсон» номли асарларини ҳам саҳналаштирган.
Маҳкам Муҳаммедов Алишер Навоийнинг «Лайли ва Мажнун», Маҳмудхўжа Беҳбудийнинг «Падаркуш», Ҳамзанинг «Майсаранинг иши», Нозим Ҳикматнинг «Ажал шамшири», Парда Турсуннинг «Ўқитувчи», Лев Толстойнинг «Кавказ асири», Чингиз Айтматовнинг «Биринчи ўқитувчи» асарлари асосида телевизион спектаклларни ҳам саҳналаштирган.
Баҳром Ёқубов
Таниқли ўзбек кинорежиссёри Баҳром Ёқубов 11 март куни 60 ёшида оламдан ўтди.
Баҳром Ёқубов ижодий фаолиятини 1989 йилда «Ёш ёзувчининг кундалиги» номли қисқа метражли фильмни тасвирга олишдан бошлаган. У ўтган йиллар мобайнида «Сарвиноз», «Бахт учун миллион», «Ташландиқ», «Ёндиради, куйдиради», «Фотима ва Зуҳра», «Суғдиёна», «Жодугар», «Қочқин», «Бойвачча куёв», «Мажруҳ», «Ичкуёв», «Суперкелинчак», «Зирапча», «О Марям, Марям» каби кўплаб фильмларни суратга олган.
Режиссёр 2020 йилда «Антиқа ажрашиш» номли фильмни суратга олган эди.
Мирза Азизов
Ўзбекистон халқ артисти Мирза Азизов 16 апрель куни 58 ёшида вафот этди.
У 1963 йил 22 майда Наманган вилоятининг Чуст туманида туғилган. 2016 йилдан бугунги кунга қадар Муқимий номидаги Ўзбекистон давлат мусиқали театри
директори лавозимида фаолият юритиб келган. 1999 йилда Ўзбекистонда хизмат кўрсатган артист, 2013 йилда Ўзбекистон халқ артисти унвонларига сазовор бўлган.
2019 йил адабиёт ва санъат йўналиши бўйича Қирғизистон Республикасида таъсис этилган Халқаро Чингиз Айтматов номидаги «Олтин медал» мукофотига лойиқ кўрилган. 2017 йилдан бери Қирғизистон театр арбоблари уюшмасининг театр санъати бадиий академиясининг академиги этиб ҳам сайланган эди. У режиссёр сифатида «Жайдари келин», «Дилдаги доғ», «Сарвқомат дилбарим» каби ўнлаб спектаклларни саҳналаштирган.
Мирза Азизов ўзбек томошабинларига «Тубанлик», «Гумроҳлар», «На малакман, на фаришта», «Алпомишнинг қайтиши», «Шоҳнома» каби кўплаб фильм ҳамда спектакллардаги роллари орқали танилган эди.
Баҳодир Йўлдошев
Таниқли режиссёр Баҳодир Йўлдошев шу йилнинг 16 май куни 76 ёшида бу ёруғ оламни тарк этди.
У 1945 йилда Самарқанд вилоятининг Каттақўрғон шаҳрида санъаткорлар оиласида туғилган. 1970 йилда Тошкент театр ва рассомлик институтини тугатган. 1971–1974 йилларда Ҳамза номидаги Ўзбек академик драма театрида режиссёр, 1974–1984 йилларда бош режиссёр бўлиб ишлаган.
Кўплаб спектаклларга режиссёрлик қилган Баҳодир Йўлдошев актёр сифатида Олчинбек («Оловли йўллар»), Мухторов («Тоғдаги учрашув»), Шерзод («Олмос камар»), Собиров («Ошпаз») каби образларни яратган.
Баҳодир Йўлдошев Ўзбекистонда хизмат кўрсатган санъат арбоби (1979), Ўзбекистон халқ артисти (1995) унвонлари билан тақдирланган.
Муҳаммад Рафиқов
Ўзбекистонда хизмат кўрсатган артист, Ўзбекистон Республикаси санъат арбоби, «Дўстлик» ордени соҳиби Муҳаммад Рафиқов 81 ёшида пневмония касаллиги билан вафот этди.Муҳаммад Рафиқов «Бобур» телефильмида Шайбонийхон, «Амир Музаффархон»да Музаффархон, «Ҳаким ва ажал» видеофильмида Ибн Сино, «Имом ал-Бухорий» сериалида Бухорий, «Соҳибқирон» сериалида Амир Темур, «Шайтанат» сериалида Абдураҳмон табиб, «Қўқон шамоли» фильмида шайх ул-ислом каби ролларни маҳорат билан ижро этган.
Ўлмас Расулов
Ўзбекистон халқ артисти Ўлмас Расулов шу йилнинг 13 сентябрь куни 70 ёшида вафот этди.У 1951 йилда Сурхондарё вилоятида таваллуд топган. 1976 йилда Тошкент консерваториясини тамомлаган. У фаолияти давомида олий ва ўрта махсус ўқув юртларида педагоглик фаолиятини амалга ошириб, кўплаб шогирдлар етиштирди. Умрининг сўнгги йилларида Ўзбекистон давлат санъат ва маданият институтининг «Миллий қўшиқчилик» кафедраси доценти, 2021 йилдан эса профессор вазифасида фаолият юритди.
Созанда сифатида унинг рэпертуаридан «Шашмақом», Фарғона-Тошкент йўлларига оид мумтоз ва анъанавий куйлар ўрин олган. Хонанда сифатида эса «Содирхон ушшоғи», Машраб ғазали билан «Сиғмадим», «Ор йиғлайди» каби ашулалар, Бухоро йўлларидан «Забоний», «Жавоний», «Гул рези» каби асарларнинг маҳоратли ижроси билан халқ қалбига кириб борган. У «Бобур», «Кеча ва кундуз», «Имом Бухорий» каби видео ва бадиий фильмларга мусиқа басталаган.
Шуҳрат Эргашев
Ўзбекистон халқ артисти, актёр Шуҳрат Эргашев 18 сентябрь куни 76 ёшида вафот этди.
Шуҳрат Иброҳимович Эргашев 1945 йилда Тошкентда туғилган. У Тошкент театр ва рассомчилик институтининг актёрлик факультетини тамомлаган (1968). Ўқишни тугатгач, Тошкент давлат академик рус драма театрида актёр сифатида бир қатор образларни яратган.
1970 йилдан «Ўзбекфильм» киностудиясида иш бошлаган, киноактёр сифатида Элёр Ишмуҳаммедовнинг «Нозиклик» (1966) фильмида дебют қилган.
Фаолияти давомида ўттиздан ортиқ фильмда роль ўйнаган: «Дилором» (Мони), «Қўмондоннинг қайтиши» (Маузер), «У ёлғиз эмасди» (Акбаров), «Қора консулнинг ўлими» (Жамол Убайдулла), «Семурғ» (Шерзод), «Бу яхши йигит» (Тимур), «Мен сенга шаҳар бераман» (ҳайдовчи), «Учрашувлар ва ажралишлар» (Шуҳрат), «Шум бола» (киночи), «Илк йўловчилар» (Акбаров) ва шулар жумласидан.
Бахтиёр Ихтиёров
Ўзбекистон халқ артисти Бахтиёр Ихтиёров 21 ноябрь куни 81 ёшида ҳаётдан кўз юмди.
Бахтиёр Ихтиёров 1940 йил 28 мартида Бухорода туғилган. 1963 йилда Островский номидаги Тошкент театр ва рассомчилик институтининг (ҳозирги Ўзбекистон давлат санъат ва маданият институти) мусиқали драма факультетини тамомлаган.
1956 йилдан Бухоро мусиқали театрида ишлаган, 1959-1976 йилларда Муқимий номидаги мусиқали театрида актёр ва режиссёрлик қилган, 1980-1988 йилларда театр бош режиссёри бўлган.
1976-1980 йилларда «Ёш гвардия» театри (ҳозирги Аброр Ҳидоятов номидаги театр)да ишлаган, 1988-1991 йилларда Абдулла Қаҳҳор номидаги Сатира театрида бош режиссёр бўлган, 1991 йилдан шу театрда актёр ва режиссёр сифатида ишлаган.
Бахтиёр Ихтиёров сермаҳсул ижоди давомида «Ёр-ёр», «Ажойиб хаёлпараст», «Ўтган кунлар», «Нодирабегим», «Еттинчи жин», «Абу Райҳон Беруний», «Еттинчи ўқ», «Шум бола» каби жуда кўплаб фильмларда роллар ижро этиш билан бир қаторда ўзбек театр санъати ривожига ҳам муносиб ҳисса қўшган.
Санжар Саъдуллаев
Ўзбек дубляж соҳасида сермаҳсул ижод қилган Санжар Саъдуллаев 4 декабрь куни касалхонада вафот этди. У 67 ёшни қаршилаганди.
У 1954 йилнинг 10 июль санасида Тошкент шаҳрида туғилган. Тошкент давлат театр ва санъат институтининг драма ва кино актёрлиги бўлимида таҳсил олган.
Санжар Саъдуллаев ўзбек дубляж санъатининг энг таниқли ва энг рейтинги баланд актёрларидан ҳисобланарди. Уни мухлислар «сирли актёр» дея таърифлашган. Чунки у баъзи санъат соҳаси вакилларидан фарқли ўлароқ, ўзини оммадан узоқ тутишга ҳаракат қилган, камералар қаршисига чиқмаган ва интервью бермаган.
Санжар Саъдуллаев фаолияти давомида 1000 дан ортиқ фильмга овоз берган. Жумладан «Қашқирлар макони» (Пўлат Аламдар), «Қиш сонатаси» (Жунсанг), «Ичкарида» (Комиссар Юсуф, Сарп, Ҳасан қизил ёноқ), «Севги изтироби» (Камол), «Сўйла, Қора денгиз» (Ведад) каби юзлаб сериаллар ва бадиий фильмлардаги бош қаҳрамонлар образини гавдалантирган. Қолаверса, у ҳинд фильмларида Болливуд қироли актёр Шоҳруҳ Хонга доимий равишда овоз бериб келган.
Муҳаммадкарим Соипов
«Вой аламжон» қўшиғи билан танилган хонанда Муҳаммадкарим Соипов 8 декабрь куни 58 ёшида вафот этди. У 1963 йил Қирғизистоннинг Ўш шаҳрида таваллуд топган. Хонанда «Вой аламжон», «Оқ бўйра», «Қайдадур», «Дуторим», «Ташна ҳислар» сингари қўшиқлари билан мухлислар қалбидан жой олган.
Шермат Ёрматов
Ўзбекистон халқ артисти, таниқли композитор Шермат Ёрматов 23 декабрь куни 82 ёшида вафот этди.
Шермат Ёрматов 1939 йил Фарғона вилоятида туғилган. 1967 йилда Тошкент давлат консерваториясини хор дирижёрлиги мутахассислиги бўйича тугатган. 1962—1982 йиллар давомида Тошкент шаҳридаги 99-ўрта мактабда мусиқа ўқитувчиси ва «Бойчечак» хор студиясининг раҳбари бўлган.
Шунингдек, у «Ўзтелерадио»да хор жамоаси дирижёри (1967—1970 йиллар), «Булбулча» болалар хорининг бадиий раҳбари ва бош дирижёри (1971 йил) сифатида ишлаган.
У ўзбек болалар хорининг энг фаол тарғиботчиси, «Қўшиғим, жон қўшиғим», «Биргаликда куйлаймиз», «До, ре, ми, фа, сол», «Санъат ғунчалари» каби қатор кўрсатувлар орқали бутун республика болаларига мусиқадан таҳсил берган муаллим сифатида танилган.
Изоҳ (0)