Хитойда дунёга машҳур автомобиллар кўргазмаси бўлиб ўтди (фото)

Жорий йил 25 апрелдан 4 майгача Хитой пойтахти Пекин шаҳрида Auto China 2024 халқаро автомобиллар кўргазмаси ўтказилди. Автошоунинг биринчи кунида “Дарё” мухбири ҳам иштирок этиб, жараёндан суратлар олди.

Павильонларда Хитой, АҚШ, Германия, Франция, Япония, Жанубий Корея, Нидерландия, Швейцария, Италия ва бошқа мамлакатларнинг дунёга машҳур автокомпаниялари янги моделдаги автомобилларини намойиш қилди.

Кўргазмада BMW, Mercedes-Benz, Audi, Volkswagen, Porsche, Lamborghini, Bentley, Rolls-Royce, Lexus, Ford, Volvo, Jaguar, Toyota, Honda, Nissan, Hyundai, Kia ва бошқа юзлаб халқаро автомобиль брендлари иштирок этди.

Шу билан бирга, BYD, Chery, EXEED, Jetour, JAC, Li Xiang, Zeekr, Leapmotor, Rising, Yuanhang сингари Хитой компаниялари ҳам янги русумдаги автомобиллари билан кўргазмада ҳозир бўлди.

Пекин халқаро автомобиллар кўргазмаси 1990 йилдан бери ўтказиб келинади. Бу йилги кўргазмалар майдони қарийб 220 минг квадрат метрни ташкил этди. Павильонларга дунёнинг энг кучли брендларидан тортиб янги компанияларгача ўз автомобилларини жойлаштирган. Жорий кўргазмада 117 та янги моделдаги автомобиль, 41 та консептуал автомашиналар намойиш қилинди.