Volkswagen ишчилари учун тайёрланадиган ҳамда маҳаллий супермаркетларда сотиладиган VW Currywurst сосискалари расмий равишда компаниянинг энг оммабоп маҳсулотига айланди.
Ушбу сосискадан 8 миллиондан ортиқ сотилгани биз учун янги рекорд, дея таъкидлади концерннинг кадрлар бўйича раҳбари Гуннар Килиан.
Германияликлар учун севимли таомлардан бири ҳисобланган Currywurst колбаса маҳсулотлари, помидор соуси ва турли зираворлар аралашмасидан иборатдир. Ўтган йили Volkswagen ушбу маҳсулотдан 8,5 миллион дона сотди. Бу 2023 йилдагига нисбатан 200 мингтага кўпроқ.
Currywurst 1973 йилдан бери компаниянинг махсус заводида ишлаб чиқарилади. Унинг рецепти фақат бир нечта ходимга маълум.
2021 йили мазкур маҳсулотнинг аҳамиятини кўрсатадиган воқеа юз берди. Ўшанда Volkswagen Currywurst’ни менюдан чиқариб ташлагач, ишчилар норозилик билдирди. Вазиятга ҳатто Германиянинг собиқ канцлери Герҳард Шрёдер аралашиб, сосискани “малакали ишчининг энергия манбаи” деб атади. Алал-оқибат, компания расмийлари хато қилганини тан олиб, уни менюга қайтарган.
Аммо бу концерн учун деярли ягона қувонарли хабар бўлиб турибди. Йиллик ҳисоботга кўра, Volkswagen’нинг соф даромади 30,6 фоизга қисқарган, бунга ишлаб чиқариш харажатларининг ошиши ва Хитой бозоридаги савдо ҳажмининг камайиши сабаб бўлди.
Бундан ташқари, компания 2024 йили Германия касаба уюшмалари билан узоқ давом этган низо бўйича келишувга эришди. Унга биноан Volkswagen 2030 йилгача 35 минг иш ўрнини қисқартиради.
Volkswagen молиявий директори Арно Антлитзнинг таъкидлашича, улар “харажатларни мунтазам камайтириш ва рентабелликни ошириш”га эътибор қаратмоқда. Бироқ глобал сиёсий беқарорлик ва Дональд Трампнинг Европа иттифоқи автомобилларига 25 фоизли бож жорий этиш ҳақидаги таҳдидлари концерн учун жиддий хавф туғдиряпти.
Изоҳ (0)