25 йилликдаги энг йирик IPO: Porsche 75 миллиард еврога баҳоланди

Porsche Германияда йигирма йил ичидаги энг йирик IPO’ни ўтказди. Компания 9,4 миллиард евро йиғди ва 75 миллиард еврога баҳоланди. Бу ҳақда «Коммерсантъ» хабар бермоқда.

Германиянинг ҳашаматли автомобиллар ишлаб чиқарувчи Porsche компанияси 28 сентябрь, чоршанба куни IPO ўтказди.

Бу тарихдаги энг йирик Европа фонд биржаларидан бири ва Германиядаги сўнгги 25 йилдаги энг йирик IPO бўлди.

IPO (Initial Public Offering) — бу компания акцияларининг фонд биржасида биринчи жойлаштирилиши.

Акция — бу корхона ишлаб чиқарадиган қимматбаҳо қоғоз. Акцияларни сотиб олган аҳоли вакиллари ёки компаниялар бизнесга шерик бўлиб қолишади.

Компания учун IPO — бу манфаатли шартларда йирик инвестицияларни жалб қилиш усули.

Акцияларни жойлаштиришда компаниялар 82,5 евро яъни аввал белгиланган нархнинг юқори чегарасида савдо қилди. Шундай қилиб, Porsche’нинг умумий қиймати 75 миллиард еврога баҳоланди. Компания IPO давомида 9,4 миллиард евро йиғди.

Бугун, 29 сентябрда Франкфурт фонд биржасида савдонинг очилишида компания акциялари 84 еврогача кўтарилди — аммо кейин улар 62 еврогача кескин тушиб кетди. Сўнгги пайтларда IPOдан кейинги акцияларнинг пасайиши одатий ҳолга айланди.

IPO олдидан Porsche устав капитали иккита тенг қисмга бўлинган: компания капиталининг 50 фоизи оддий акцияларга, қолган 50 фоизи эса овоз бериш ҳуқуқисиз имтиёзли акцияларга айланди.

IPO давомида инвесторларга компания имтиёзли акцияларининг 25 фоизи сотилган. Таклифдан сўнг Porsche’нинг асосий улуши — оддий акцияларнинг 25 фоизи ва 1 та улуш ҳали ҳам Porsche ва Пиеч оилаларига тегишли. Volkswagen компания акцияларининг 12,5 фоизига эгалик қилади.

Охирги бир неча ой ичида аксарият компаниялар, жумладан, бошқа ҳашаматли автомобиль ишлаб чиқарувчилари: Aston Martin, Ferrari, BMW, Mercedes-Benz акциялари пасаймоқда.

Деалогиc таҳлилий фирмасининг маълумотларига кўра, 2021 йилда АҚШдаги IPO билан биржага чиққан компанияларнинг 87 фоизи ҳозирда IPO нархидан пастроқ савдо қилмоқда.

Бундай шароитда кўплаб компаниялар биржада рўйхатга олишдан бош тортмоқда — АҚШда IPOлар ўн йилдан ортиқ вақт ичидаги энг ёмони бўлиши кутилмоқда.

Porsche СЕ — Porsche ва Piech оилалари томонидан назорат қилинадиган холдинг компанияси — алоҳида баёнотга кўра, 7,9 миллиард еврогача қарз маблағлари билан оддий акцияларни сотиб олишни молиялаштиради.

Porsche ва Volkswagen 2011 йилда бирлашган. Ўша пайтда Porsche Volkswagen шўъба корхонаси этиб тайинланган эди.

Volkswagen Porsche бош компанияси бўлишдан ташқари, Ауди, Bugatti ва Lamborghini автомобиль компанияларига ҳам эгалик қилади.

Аввалроқ Volkswagen Германия ва Шарқий Европада автомобиль ишлаб чиқаришни тўхтатиши кутилаётгани ҳақида хабар берилганди.