Сайёрамизнинг келажаги ҳақида қайғураётганлар кўпайиб бормоқда. Улар нафақат иқлим ўзгариши ва бошқа экологик таҳдидлардан қўрқишади, балки атроф-муҳитни асраш учун ҳам ўз ҳиссаларини қўшишга ҳаракат қилишади. Бунинг кўплаб усуллари мавжуд — чиқиндиларни алоҳида йиғишдан тортиб, ёш дарахтларни экишгача.
Энг самаралиларидан бири бу автомобилингизни ички ёнув двигателини электромобилга алмаштиришдир. Агар бу оммавий миқёсда содир бўлса, глобал исишга сабаб бўладиган ифлослантирувчи моддаларнинг атмосферага чиқарилишини камайтириш мумкин бўлади. Бироқ экологик тозалик электр моторли автомобилларнинг ягона афзаллиги эмас — уларни сақлаш арзонроқ, қулайроқ ва хавфсизроқ.
Буни кўпчилик билмаса керак — биринчи электромобил ички ёнув двигателли автомобилдан анча олдин пайдо бўлган. Электр двигателли биринчи ҳаракатланувчи модел венгриялик ихтирочи Жедлик Анёс томонидан 1828 йилда яратилган ва бензин билан ишлайдиган биринчи автомобиль 1870 йилда Венада пайдо бўлган. Кейинчалик, бу иккала йўналиш параллел равишда ривожланган, электр ва бензинли транспорт воситалари тахминан бир хил ҳайдаш хусусиятларига эга эди, аммо ўта мураккаб зарядлаш жараёни туфайли электромобиллар орқага чекинишга мажбур бўлди.
1970 йилларда глобал энергетика инқирози шароитида ёқилғи нархи кескин кўтарилган пайтда электромобилларга қизиқиш бир оз ортди. Аммо 1980 йилларнинг бошларида нефть бозоридаги вазият ўзгарди ва шахсий транспортни электрлаштириш жараёни пасая бошлади.
21-асрда электромобиллар яна машҳур бўла бошлади — нефть маҳсулотларининг нархлари барқарор ўсиши ва технологиянинг ривожланиши туфайли ички ёнув двигателли автомобилдан ҳеч қандай кам бўлмаган электромобилларни ишлаб чиқариш имкони пайдо бўлди. 2008 йилда Американинг Tesla Motors автомобиль компанияси ўзининг биринчи электромобилини чиқарди, кейин Nissan, BMW, Mitsubishi ва Chevrolet каби Европа, Америка ва Япониянинг етакчи компаниялари маҳсулотларни электр тортишга айлантириш жараёнига қўшилишди.
Дунёнинг кўплаб етакчи автомобиль ишлаб чиқарувчилари 2023 йил Мюнхенда бўлиб ўтган IАА Моbility 2023 кўргазмасида иштирок этди, у ерда электромобиллар келажаги яна бир бор марказий ўринни эгаллади.
Volkswagen, Mercedes ва BMW каби немис автомобиль брендлари ўз юртларида юқори натижаларни кўрсатишса-да, сўнгги пайтларда электромобил йўналишида халқаро миқёсдаги сотув бўйича пастроқ ўринларни эгаллашди.
Сабаби улар халқаро ички ёнув двигателлари устида ишлашни давом этишмоқда. Аммо Tesla ва Хитой бозори етакчиси BYD каби кўпроқ ихтисослашган компаниялар олдинга чиқишди.
Қуйидаги расмда 2023 йилнинг биринчи ярмида бренд бўйича глобал электр автомобиллар сотуви ифодаланган.
2023 йилнинг биринчи ярмида фақатгина BYD деярли 1,2 миллион дона электр транспорт воситаларини (шу жумладан, plug-in гибридларини) сотди, бу BMW, Volkswagen ва Mercedes автомобилларининг умумий ҳажмидан қарийб икки баравар кўп. Volkswagenни Хитойда 1-рақамли автомобиль бренди сифатида ортда қолдирган компания энди Европани эгалламоқда. 2023 йилнинг январь ва июль ойлари орасида компания хорижда 92 469 та электромобил сотди, бу эса 2022 йилдаги умумий кўрсаткичдан юқори.
Ўзбекистон миқёсида эса охирги уч ойда импорт қилинган электромобилларнинг қиймати 400 миллион доллардан ошди. Божхона қўмитаси матбуот хизмати маълумотларига кўра, 2023 йилнинг январь ойидан ноябргача Ўзбекистон ҳудудига 22 500 мингта электромобил олиб кирилди. 2022 йилнинг шу даврига нисбатан импорт ҳажми 6 баравардан ортиқ ўсди, республикага етказиб берилган йўловчи электр транспорт воситаларининг умумий қиймати тахминан 580 миллион долларни ташкил этди.
Хитой электр транспорт воситаларининг асосий етказиб берувчиси сифатида ўз ўрнини сақлаб қолди. 2023 йил бошидан Хитойдан ўртача 21 000 мингта электромобил олиб кирилди. Иккинчи ўринни эса Гонконг эгаллади ва у ердан 1 300 та атрофида электромобил импорт қилинган.
Кейинги ўринларда БАА (150 та автомобиль), Жанубий Корея (140 та), АҚШ (135 та) ва Германия (125 та) бормоқда. Фоиз миқёсида мамлакатимизга олиб кирилган электр транспорт воситаларининг умумий улуши 100% деб олинса, 92% электромобиллар Хитойдан олиб келингани ойдинлашади.
Ферузбек Алиев
Изоҳ (0)