Жиззах вилоятининг Фориш туманидаги сел оқибатлари ва унинг одамлар ҳаётига таъсири ҳақида гапирган форишлик яна бир аёл Муҳайё Сойибова «Дарё» билан суҳбатда ўша куни кўрган-билганларининг энг даҳшатлиси қўшни ҳовли дарвозаси олдидан ёш қизнинг мурдаси топилганини айтмоқда.
«Ўша куни кечки пайт соат бешларда ишдан қайтдим. Келсам, уйимиз томонга ҳеч кимни ўтказишмаяпти. Биз ҳам уйга ўтолмадик. Шу ерда қутқарувчилар қўшнимизнинг сувда оқиб кетган набираларини излашаётган экан. Кейин қўшнимизнинг дарвозаси олдидан бир жасад топишди. Ёш қизнинг мурдаси экан. Қўлма-қўл қилиб кўтариб, шифохонага олиб кириб кетишди», — дейди Муҳайё Сойибова.
Суҳбатдош аёлнинг айтишича, ўша куни улар уйига ўтказилмай, юқори томондаги қўни-қўшнилар хонадонига юборилган.
«Ўша кунги даҳшатли сел ёши катта ўқитувчини ҳам оқизиб кетган. Шунингдек, маҳалла раисининг келини ва икки набирасини олиб кетган. Ёш қизчалардан бири ва онасининг мурдаси ўша куни топилган. Иккинчи қизалоқ мурдаси эса кейинги куни топилган», — дейди суҳбатдош.
Эгизбулоқ қишлоғида яшовчи Шавкат Сойибов ҳам ўша куни содир бўлган сел ҳақида гапириб, селга ғарқ бўлган қизалоқлардан бирининг мурдасини уйи ёнидан топганини айтмоқда.
«Ўша куни селда оқиб кетган 11-синф қиз поччамнинг қизи бўлади. Ёш қизалоқлар ва уларнинг онаси эса юқоридаги қўшнимизнинг келини ва набиралари эди. Мен селдан зўрға омон қолиб, кўчага чиқсам, уйимиз ёнида бурчакка тиқилиб қолган қизалоқ мурдасини кўрдим. Бу қўшнимизнинг набираси эди. Кейин бу ҳақда қутқарувчиларга хабар бердим. Бироздан сўнг эса ўша қизчанинг онаси топилди. Иккинчи қизалоқ эса эртаси куни анча жойга оқиб борган манзилидан топилди», — дейди Шавкат Сойибов.
«Дарё» билан суҳбатда бўлган Дилфуза Саяқулова ҳам айнан шу 11-синф ўқувчиси ҳақида гапириб, «Уларнинг уйи селнинг айнан йўлида жойлашгани учунми, уларда сел биздан-да кучли бўлган. Қизнинг акаси онаси ва синглисини қутқариш учун уларни ушлаган. Онасини кўтариб олиб, синглисига ўзини қаттиқ ушлаб олиши кераклигини тайинлаган. Аммо, афсуски, қизнинг қўли акасини қаттиқ ушлолмай, чиқиб кетган ва селда оқиб кетган», — деганди.
Шу қишлоқда яшовчи Аваз Абдуғаниев сувга ғарқ бўлган қизалоқларнинг бири бешинчи, иккинчиси биринчи синф ўқувчиси бўлганини айтмоқда.
«Сел биздан юқори яшовчи яна бир оиланинг уч нафар вакилини, маҳалламиз раисининг келини ва икки набирасини оқизиб кетди. Хайриятки, энг кичик қизи ўша куни боғчада бўлган ва омон қолган», — дейди Аваз Абдуғаниев.
Аваз Абдуғаниевнинг қўшимча қилишича, сел қурбонларидан яна бири шу қишлоқда яшовчи ёши олтмишларга борган математика фани ўқитувчиси бўлган.
«Сел устозимиз, математика фани ўқитувчиси ҳам оқизиб кетган. Унинг мурдасини ҳам сал наридан топишди. Раҳматли жуда яхши инсон эди», — дейди Аваз Абдуғаниев.
Изоҳ (0)