Жиззах вилояти Бахмал туманида бедарак йўқолган олти ёшли бола каналдан ўлик ҳолда топилди. Бу ҳақда “Миллар” дастурида хабар берилди.
Унга кўра, 3 май куни Жиззах вилояти Бахмал тумани Наврўз қишлоғида яшовчи 6 ёшли боланинг йўқолгани ҳақида хабарлар тарқалган. Унинг оила аъзолари орадан икки кун ўтгач жасадини каналдан топди. Болакайнинг отаси воқеа ҳақида гапириб, ўлим сабабидан шубҳаланаётганини қайд этди.
“Каналдан тапочкаси топилди, сувга тушган деган хаёл билан сувни изладик. 5 май куни соат 14:10 да ўғлимнинг танаси сувдан ўлик ҳолда топилди. Танасини кўрганимда уни 40 соат давомида сувда қолган танага ўхшамади. Ўлимининг сабаби сувда чўкиш, дейиляпти. Ўзи чўкканми ёки чўктирилганми, бу ҳам номаълум. Яшаш уйимиздан икки километр узоқликдан топилган. Устида футболкаси бор эди уйдан чиқиб кетганида. Лекин топганимизда футболкаси топилмади. Танасида ортиқча шилиниш-тирналишлар йўқ. Йўқолган пайт кўчада одам гавжум бўлган. Лекин уни дарёга борганини кўрган одам йўқ. Тегишли ташкилотлар назоратини янада кучайтиришини сўрайман”, — дейди марҳумнинг отаси.
Ҳозирда вилоят прокуратураси томонидан ҳолат юзасидан терговга қадар текширув ҳаракатлари давом этмоқда.
Изоҳ (0)