Эски одатларни ўзгартириш ва янги усулда тозалашни ўрганиш вақти келди. «Новий очаг» нашри уйни тозалашда йўл қўйиладиган хатоларни санаб ўтди.
Барча хоналар учун битта матодан фойдаланиш
Мато доимо ҳар хил ювиш воситалари билан алоқа қилишига қарамай, унинг юзасида бактерия, замбуруғ ва паразитлар сақланиб қолиши мумкин. Худди шу тозаловчи мато ёрдамида уларни хонадан хонага олиб юрилади. Агар у билан ошхона, сўнгра болалар хонаси тозаланса, бу жуда хавфлидир. Бунинг олдини олиш учун турли рангдаги микрофибер матоларидан фойдаланиш тавсия этилади. Уларни ҳар бир хона учун ажратиб, тозалаш ишни осонлаштиради, шунингдек, туғилажак муаммоларнинг олди олинади.
Чанг тозалайдиган восита — пипидастрдан фойдаланиш
Ушбу чангни тозалаш воситаси узоқ вақт давомида самарасиз деб ҳисобланган. Ишлаб чиқарувчиларнинг ишонтиришларидан фарқли ўлароқ, улар фақат чангнинг тарқалишига ёрдам беради. Чангга қарши курашда нам тозалашдан кўра яхшироқ воситалар ҳали ихтиро қилинмаган. Сиртни сув ёки тозалаш воситаси билан намланган микрофибер мато ёрдамида артиб олиш ва ортиқча намликни юмшоқ қоғоз сочиқ билан қуритиш мумкин.
Чангюткич фильтрларини тозалашни унутиш
Фильтр чанг ва кир билан тўлганлиги сабабли чангюткичнинг тозалаш қуввати пасайишни бошлайди. Бундан ташқари, чанг зарраларини орқадан чиқариши мумкин, бу эса квартирадаги ҳавони янада ёмонлаштиради. Шунинг учун ҳар бир тозалашдан кейин чангюткичнинг чанг тўплайдиган идишлари ва қопларни бўшатиш керак. Қурилма электр тармоғидан узилганидан сўнг корпус, трубка ва бошқа жиҳозларини нам мато билан артиб олиш тавсия этилади.
Барча ошхона анжомларини идиш ювиш машинасида ювиш
Баъзи жиҳозларни, масалан, саримсоқ майдалагич, блендер ёки қирғични идиш ювиш машинасига қўймаслик керак. Техника ҳар доим ҳам тиқилиб қолган озиқ-овқат зарраларини ювишга қодир эмас. Агар улар тозаланмаса, кейинги фойдаланишда улар озиқ-овқатга аралашиб, заҳарланишига олиб келиши мумкин. Иложи борича ошхона жиҳозларини қўллар билан ювиш ва дарҳол қуритиб қўйиш тавсия этилади.
Ошхона раковинасини идиш-товоқ губкаси билан тозалаш
Губка ошхонадаги энг нопок нарсалардан биридир. Унда бактериялар тўпланади, айниқса уни ўз вақтида дезинфекциялаш ва янгилаш унутилса. Айнан у билан ошхона раковинасини тозалаш бу вазиятни янада ёмонлаштиради. Раковинани ювиш учун алоҳида губка ёки матодан фойдаланиш лозим. Қолаверса, уни мунтазам равишда дезинфекцияли эритмаларда ювишни унутмаслик жуда ҳам муҳим.
Уй тозалашни полдан бошлаш
Агар аввал пол артилиб, кейин стол ва шкафдаги чанг тозаланса, эҳтимол бу ишни икки бараварга қийинлаштиради. Чунки юқоридан тушган чанглар яна полда тўпланади ва уларни яна қайта тозалашга тўғри келади. Шунинг учун тозалашни ҳар доим юқоридан пастга қараб бошлаш керак. Дераза, токчалар ва мебелларни артиб олиш, диван ва креслоларни тозалаш, шундан кейингина полларни артиш мумкин.
Кир ювиш машинасини ҳеч қачон тозаламаслик
Нопок кийимлар билан бирга, ўлик тери ҳужайралари, чанг ҳам машина ичига ўрнашади. Улар эшикка, қувур ва фильтрга жойлашади. Вақт ўтиши билан машинанинг ички қисмлари шунчалик кир бўлиб қоладики, кейинчалик бу кийимларда ёқимсиз ҳид келишига олиб келади. Вақти-вақти билан кир ювиш машинасини тозалаб туриш уни узоқ муддат муаммосиз хизмат қилишига ёрдам беради.
Тахтакачни идиш ювиш суюқлиги билан тозалаш
Идиш ювиш воситаси ва иссиқ сув фақат кўринадиган озиқ-овқат қолдиқларини олиб ташлайди. Аммо унинг зарралари анча чуқурроқда ҳам бўлиши мумкин. У ерда улар чириб, патоген бактериялар ривожланиши учун қулай муҳит яратади. Шунинг учун ёғоч ва пластик тахтакачларни водород перикс қўшилган сувда намлаш (0,5 л сув учун 2 чой қошиқ), кейин тоза сувда яхшилаб ювиб ташлаб, қуритиш тавсия этилади.
Изоҳ (0)