Президентнинг ташқи сиёсат бўйича махсус вакили, собиқ ташқи ишлар вазири Абдулазиз Комилов 8-9 йил аввал Ўзбекистон қўшни давлатлар билан ҳарбий тўқнашувга кириши мумкин бўлгани ҳақида гапирди. Бу ҳақда у "Ishonch.uz" нашрига берган интервьюсида айтиб ўтган.
Собиқ ташқи ишлар вазири ўз сўзида “ўзимизнинг вазиятни эслаб ўтди”.
“2016–2017 йилларда биз қўшни давлатлар билан алоқалар кескинлашиб кетганида битта хавфли нуқтага келиб тақалдик. Вазият ўша шаклда давом этганида ҳарбий тўқнашиш ҳам турган гап эди.
Муҳтарам Шавкат Миромонович Мирзиёев президентликка келганларида, Марказий Осиё – бизнинг устувор йўналишимиз ташқи сиёсатимизда, деб белгилаб бердилар. Нега деганда кўп муаммолар йиғилиб қолганди. Бунга қўшимча ўзимиз ҳам ўз қўлимиз билан, очиқ айтиш керак, кўп муаммоларни яратдик. Агар булар ҳал бўлмаганида, кескинлашиб кетганида, жуда ёмон оқибатга олиб келарди. Шуни инобатга олиб муҳтарам президентимиз 2017 йили БМТ минбарида туриб сиёсатимизнинг устувор йўналишлари Марказий Осиё бўлишини айтдилар. Ва жуда муҳим ташаббусни илгари сурдилар. Бу - Марказий Осиё давлатлари раҳбарлари билан маслаҳат учрашувларини ўтказиш. Ҳамма раҳбарлар бу ташаббусни қўллаб-қувватлашди”, дейди Абдулазиз Комилов.
2022 йилнинг апрелида Абдулазиз Комилов ташқи ишлар вазири лавозимидан кетган эди. У 2012 йилдан бери Ўзбекистон ташки ишлар вазири сифатида фаолият юритиб келган.
2024 йилда Туркманистон президенти Сердар Бердимуҳамедов Ўзбекистоннинг собиқ ташқи ишлар вазири, айни пайтда президент ҳузуридаги Хавфсизлик кенгаши котиби ўринбосари Абдулазиз Комиловни Туркманистон ва Ўзбекистон ўртасидаги дўстлик ва ҳамкорликни мустаҳкамлашга қўшган салмоқли ҳиссаси учун тақдирлаган эди.
2025 йилнинг апрелида эса Абдулазиз Комилов Италиянинг энг юқори давлат мукофоти — “Италия Республикаси олдидаги хизматлари учун” ордени билан тақдирланди.
Изоҳ (0)