Президентнинг ташқи сиёсат бўйича махсус вакили, Хавфсизлик кенгаши котиби ўринбосари Абдулазиз Комилов Италиянинг энг юқори давлат мукофоти — “Италия Республикаси олдидаги хизматлари учун” ордени билан тақдирлангани маълум қилинди.
Бу ҳақда Италия Республикаси президенти бош котибиятининг Gazzetta Ufficiale ҳукумат газетаси расмий сайтида эълон қилинган. Рўйхатга Италия ва хорижий мамлакатларнинг бошқа таниқли арбоблари ҳам киритилган.
“Италия Республикаси олдидаги хизматлари учун” ордени Италиянинг олий давлат мукофоти бўлиб, 1951 йил 3 мартда таъсис этилган. У Италия фуқаролари ва чет элликларни адабиёт, санъат, иқтисодиёт, хайрия, ижтимоий ва гуманитар фаолият соҳаларида миллат олдидаги катта хизматлари учун тақдирлаш учун мўлжалланган.
Мукофотлаш Италия президенти томонидан Вазирлар кенгаши раисининг розилиги билан, одатда йилига икки марта: 2 июнь (республика ташкил топган кун) ва 27 декабрь (Конституция куни)да амалга оширилади.
2024 йилда Туркманистон президенти Сердар Бердимуҳамедов Ўзбекистоннинг собиқ ташқи ишлар вазири, айни пайтда президент ҳузуридаги Хавфсизлик кенгаши котиби ўринбосари Абдулазиз Комиловни Туркманистон ва Ўзбекистон ўртасидаги дўстлик ва ҳамкорликни мустаҳкамлашга қўшган салмоқли ҳиссаси учун тақдирлаган эди.
Изоҳ (0)