Ўзбекистон президентининг ташқи сиёсат масалалари бўйича махсус вакили Абдулазиз Комилов 12 март куни Ислом ҳамкорлик ташкилотининг (ИҲТ) Жидда шаҳридаги қароргоҳида ИҲТ бош котиби Ҳусайн Иброҳим Тоҳа билан учрашди. Бу ҳақда “Дунё” агентлиги хабар берди.
Суҳбат давомида Ҳусайн Иброҳим Тоҳа сўнгги 5 йилда Янги Ўзбекистон мусулмон давлатлари билан алоқаларни сезиларли даражада оширганини таъкидлаган. Тошкентнинг янги сиёсати сиёсий, савдо-иқтисодий, сармоявий ҳамкорликни ривожлантириш ва кенгайтиришга, ҳамда Марказий Осиё барқарорлиги ва хавфсизлигини мустаҳкамлаш масалаларига ижобий таъсир кўрсатмоқда.
ИҲТ бош котиби Ҳусайн Иброҳим Тоҳа, шунингдек, Ўзбекистон афғон масаласида муҳим рол ўйнашини ва Афғонистонга кўп томонлама гуманитар ҳамда иқтисодий ёрдам кўрсатиш бўйича турли лойиҳаларни илгари суриш ташаббуси билан чиқаётганини алоҳида қайд этган. ИҲТнинг Афғонистон бўйича махсус вакили Ўзбекистон билан бу давлат бўйича саъй-ҳаракатларни мувофиқлаштириш ва қўшма чоралар кўриш тарафдори.
Бош котибга республикада конституциявий ислоҳотлар бўйича референдум ўтказилиши ҳақида маълумот берилган. Ҳусайн Иброҳим Тоҳа ушбу муҳим сиёсий тадбирда ИҲТ кузатувчилари иштирок этишини тасдиқлади.
Унинг айтишича, тарихий Самарқанд шаҳрини кўриш учун Рамазон ойидан сўнг Ўзбекистонга ташриф буюришни режалаштирмоқда.
Изоҳ (0)