Ўзбекистон Республикаси президентининг ташқи сиёсат бўйича махсус вакили Абдулазиз Комилов 4 декабрь куни БМТнинг Нью-Йоркдаги штаб-квартирасида бўлиб ўтган “Глобал ва минтақавий кун тартибининг долзарб масалалари: Ўзбекистон нуқтаи назари” мавзусидаги брифингда нутқ сўзлади.
Брифинг Ўзбекистон президентининг БМТ Бош ассамблеясининг сентябрь ойида бўлиб ўтган 78-сессиясида қилган чиқиши ва ташаббусларига бағишланди.
“Умумий кун тартибидаги энг муҳим масалалар бўйича мунтазам форумлар ўтказиш орқали Самарқанд ташаббусини амалга ошириш глобал мулоқотни шакллантириш, келишилган ёндашув ва ечимларни излаш, ишончни тиклаш ва глобал кескинликни пасайтиришга муносиб ҳисса қўшади”, — деди Абдулазиз Комилов.
Бугунги кунда ишонч ва ўзаро тушуниш, давлатларнинг зиддиятларни келишилган ва муросали ёндашувлар асосида ҳал қилиш қобилиятига эга бўлиши ҳар қачонгидан ҳам муҳим.
Абдулазиз Комилов эслатиб ўтганидек, ана шундай шароитда Ўзбекистон раҳбари 2022 йилдаёқ “Умумий хавфсизлик ва фаровонлик йўлида Самарқанд бирдамлик ташаббуси”ни илгари сурган эди.
Унинг мазмун-моҳияти минтақавий ва глобал муаммоларни биргаликда ҳал этиш бўйича мулоқотни йўлга қўйишдан иборат.
Ўзбекистон раҳбари Шавкат Мирзиёев “Бизнинг асосий мақсадимиз мамлакатларимиз ва халқларимизнинг бугуни ва келажаги учун масъулиятни чуқур англаш, очиқ мулоқотга тайёр барча томонларни глобал мулоқот
ва конструктив ҳамкорликка жалб қилишдир” дея таъкидлаб ўтганди.
“Ўзбекистон минтақанинг экологик муаммоларини ҳал қилишга ўз ҳиссасини қўшмоқда. Мамлакат Бирлашган Миллатлар Ташкилотининг иқлим ўзгариши бўйича доиравий конвенцияси ва Париж келишуви каби халқаро ташаббусларда фаол иштирок этмоқда”, — деди Абдулазиз Комилов БМТдаги брифингда.
Комилов таъкидлаганидек, саъй-ҳаракатлар доирасида Ўзбекистон президенти сентябрь ойида БМТ минбаридан туриб БМТ Бош ассамблеясининг “Марказий Осиё глобал иқлим муаммолари қаршисида: умумий фаровонлик йўлида бирлашиш” резолюциясини қабул қилиш ташаббуси билан чиқди.
“Мавзунинг муҳимлигини англаган ҳолда, Ўзбекистон келаси йили Самарқандда иқлим ўзгариши оқибатларини юмшатиш, шунингдек, минтақадаги экологик муаммоларни ҳал қилиш бўйича халқаро иқлим форумини ўтказишни режалаштирмоқда”, — деди президентнинг махсус вакили.
Изоҳ (0)