Prezidentning tashqi siyosat bo‘yicha maxsus vakili, Xavfsizlik kengashi kotibi o‘rinbosari Abdulaziz Komilov Italiyaning eng yuqori davlat mukofoti — “Italiya Respublikasi oldidagi xizmatlari uchun” ordeni bilan taqdirlangani maʼlum qilindi.
Bu haqda Italiya Respublikasi prezidenti bosh kotibiyatining Gazzetta Ufficiale hukumat gazetasi rasmiy saytida eʼlon qilingan. Ro‘yxatga Italiya va xorijiy mamlakatlarning boshqa taniqli arboblari ham kiritilgan.
“Italiya Respublikasi oldidagi xizmatlari uchun” ordeni Italiyaning oliy davlat mukofoti bo‘lib, 1951-yil 3-martda taʼsis etilgan. U Italiya fuqarolari va chet elliklarni adabiyot, sanʼat, iqtisodiyot, xayriya, ijtimoiy va gumanitar faoliyat sohalarida millat oldidagi katta xizmatlari uchun taqdirlash uchun mo‘ljallangan.
Mukofotlash Italiya prezidenti tomonidan Vazirlar kengashi raisining roziligi bilan, odatda yiliga ikki marta: 2-iyun (respublika tashkil topgan kun) va 27-dekabr (Konstitutsiya kuni)da amalga oshiriladi.
2024-yilda Turkmaniston prezidenti Serdar Berdimuhamedov O‘zbekistonning sobiq tashqi ishlar vaziri, ayni paytda prezident huzuridagi Xavfsizlik kengashi kotibi o‘rinbosari Abdulaziz Komilovni Turkmaniston va O‘zbekiston o‘rtasidagi do‘stlik va hamkorlikni mustahkamlashga qo‘shgan salmoqli hissasi uchun taqdirlagan edi.
Izoh (0)