Исроилнинг собиқ бош вазири Эҳуд Олмерт яҳудий давлати Ғазода ҳарбий жиноятлар содир этаётганини айтди. У минглаб бегуноҳ фаластинликлар ва кўплаб исроиллик аскарлар ҳалок бўлаётганини таъкидлади. Бу ҳақда The Guardian хабар берди.
Олмерт 2006 йилдан 2009 йилгача Исроил бош вазири сифатида фаолият юритган. У Исроил ҳукумати ҳозирда “мақсадсиз ёки аниқ режалаштирилмаган ва муваффақиятга эришиш имконияти бўлмаган уруш олиб бораётгани”ни айтди.
Исроил давлати ташкил топганидан бери ҳеч қачон бундай уруш олиб бормаган... Биньямин Нетаньяху бошчилигидаги жиноий гуруҳ Исроил тарихида ва бу соҳада мисли кўрилмаган прецедент яратди, деди Эҳуд Олмерт.
У сўнгги ҳафталарда “Фаластин аҳолиси ўртасидаги қурбонлар сони даҳшатли миқёсга” етганини таъкидлади.
Ғазодаги сўнгги операцияларнинг урушнинг қонуний мақсадлари билан ҳеч қандай алоқаси йўқ. Ҳозирги пайтда бу шахсий сиёсий урушга айланган. Унинг бевосита натижаси – Ғазони гуманитар фалокат зонасига айланишидир.
Биз ҳозир Ғазода амалга ошираётган ҳаракатлар вайронкор урушдир: тинч аҳолини сараламай, чексиз, шафқатсиз ва жиноий тарзда ўлдириш. Бу онгли равишда, ёвузлик билан, ғаразли ниятда, масъулиятсизларча белгиланган давлат сиёсатининг натижасидир. Ҳа, Исроил ҳарбий жиноятлар содир этмоқда, деди Эҳуд Олмерт.
Олмерт ўтган ҳафта BBCъга берган интервьюсида давом этаётган можарони “мақсадсиз уруш — гаровга олинганларнинг ҳаётини қутқара оладиган бирор нарсага эришиш имконияти йўқ уруш” деб таърифлаган. Унинг мазкур баёноти Исроилда жанжал келтириб чиқарган. Ўта ўнг партиялар унинг сўзларини қаттиқ танқид қилган.
Демократлар партияси раҳбари, Исроил армияси штаби бошлиғининг собиқ ўринбосари Яир Голан "соғлом фикрли мамлакат тинч аҳолига қарши урушмайди, чақалоқларни хобби сифатида ўлдирмайди ва аҳолини ҳайдаб чиқаришни ўз олдига мақсад қилиб қўймайди” деган.
Исроил ташқи ишлар вазири Гидеон Саар эса Олмерт ва Голанни “Исроил давлати ва армияга қарши дипломатик кампанияда, тарғибот урушида фаол иштирок этганликда” айблаган. Таълим вазири Йоав Киш Олмерт ва Голан “халқаро майдонда Исроилнинг обрўсини тўкувчи радикал сўл хор”га қўшилганини таъкидлаган.
Изоҳ (0)