Ғазо секторидаги 95 фоиздан ортиқ қишлоқ хўжалиги ерлари яроқсиз ҳолга келди. Бу ҳақда БМТнинг Озиқ-овқат ва қишлоқ хўжалиги агентлиги (FAO) ҳамда сунъий йўлдош маркази (UNOSAT) маълум қилди.
FAO вазиятни “ташвишли” деб баҳолаган, ва бу “очарчилик хавфини кучайтириши” ҳақида огоҳлантирган. Ғазодаги умумий экин майдонларининг 80 фоиздан ортиғи зарар кўрган. Бу ерларнинг 77,8 фоизи фермерлар учун фойдаланиб бўлмайдиган ҳолатга келган. Атиги 688 гектар ёки экин майдонларининг 4,6 фоизи экиш учун яроқли.
Вайронагарчилик Ғазодаги иссиқхоналар ва сув манбаларига ҳам таъсир қилган, иссиқхоналарнинг 71,2 фоизи ва қишлоқ хўжалиги қудуқларининг 82,8 фоизи зарар кўрган.
Бу даражадаги вайронагарчилик шунчаки инфратузилманинг йўқолиши эмас, балки Ғазонинг қишлоқ хўжалиги ва озиқ-овқат тизими, яъни ҳаёт манбаларининг бутунлай издан чиқишидир.
Бир пайтлар юз минглаб одамларни озиқ-овқат, даромад ва барқарорлик билан таъминлаган нарса бугун вайронага айланган. Экин майдонлари, иссиқхоналар ва қудуқлар йўқ қилингач, маҳаллий озиқ-овқат ишлаб чиқариши бутунлай тўхтаб қолди. Қайта тиклаш катта сармоя ва узоқ муддатли саъй-ҳаракатларни талаб қилади, деди FAO бош директори ўринбосари Бет Бекдол.
Ўтган ҳафта Исроил Ғазога “минимал” миқдорда гуманитар ёрдам етказиб беришга рухсат беришини эълон қилди. Бироқ гуманитар ташкилотлар етказиб берилаётган озиқ-овқат Ғазонинг оч қолган аҳолисига етиб бормаётганидан огоҳлантирмоқда. Шу билан бирга, Исроилнинг ҳаво ҳужумлари Ғазода ҳар куни ўнлаб фаластинликлар умрига зомин бўлмоқда.
26 май куни Исроил ҳарбий кучлари Ғазо шаҳридаги бошпана сифатида фойдаланилган мактабни бомбардимон қилди. Оқибатда ёнғин чиқиб, камида 36 фаластинлик, шу жумладан бир неча бола ҳалок бўлди.
Изоҳ (0)