Қозоғистон Қишлоқ хўжалиги вазирлиги автомобиль, сув ва темирйўл транспортида буғдой олиб киришни тақиқлашни назарда тутувчи лойиҳани тайёрлади. Бу ҳақда Zakon.kz хабар берди.
Қозоғистонга учинчи давлатлардан ва Евросиё иқтисодий иттифоқи давлатларидан автомобиль, сув ва темирйўл транспорти орқали буғдой олиб киришга 6 ой муддатга тақиқ жорий этиш назарда тутилган. Бироқ, буғдойни темирйўл орқали паррандачилик ва ун ишлаб чиқарувчи корхоналарга олиб киришга рухсат берилади. Бундай буғдой ички ва ташқи бозорда сотилмайди.
Шунингдек, тақиқ Қозоғистон ҳудуди орқали олиб ўтиладиган буғдойга алоқадор эмас. Республиканинг ички бозорида озиқ-овқат ва ем-хашакнинг етарли захиралари мавжуд. Хусусан, 2023 йилда 12,1 миллион тонна буғдой йиғиб олинган. Қайта ишлаш ва экспортга жўнатиш ҳажмларини ҳисобга олса, 1 март ҳолатига кўра, 11,5 миллион тонна буғдой мавжуд.
Қозоғистон Россиядан қўшимча буғдой олади, бу эса ички бозорда талабнинг пасайишига ва нархларнинг тушишига олиб келади. Шундай қилиб, жорий йилнинг январь ойида Россиядан темирйўл орқали 174 минг тонна буғдой импорт қилинган. Бу 2022 йил даражасидан (127,8 минг тонна) 35 фоизга кўпдир. Ёзда сув транспорти орқали 29 минг тонна буғдой импорт қилинган, бу эса ички бозорда Россия буғдойининг ҳажмини оширади. Импортнинг ўсиши эса қўшни республикада буғдойни сотиш муаммосини янада кучайтиради.
Изоҳ (0)