Замонавий испан футболининг энг ёрқин истеъдод эгаларидан бири — Иско нафақат майдондаги ҳаракатлари, балки шахсий ҳаёти, болаликдаги орзулари ва футболдаги карьераси билан ҳам кўплаб мухлисларнинг эътиборини қозонган. У болалигидан футболга ошно бўлган ва ўз меҳнати билан профессионал футболда катта муваффақиятларга эришган. Қуйидаги мақолада эса сиз Исконинг оддий майдончадан катта стадионларгача бўлган йўлини, унинг орзулари, севимли футболчилари ва шахсий ҳаётидаги энг муҳим воқеалардан хабардор бўласиз.
Иско – болалигидан футболга ошно бўлган юлдуз
Франциско Роман Аларкон Суарес, мухлислари орасида Иско номи билан танилган футболчи 1992 йил 21 апрелда Испаниянинг Малага шаҳри яқинидаги Арроё де ла Миэл қишлоғида туғилган. У 1,76 метр бўйга эга ва вазни 74 килограмм. Футболга бўлган меҳри ёшлигиданоқ намоён бўлган. Отаси совға қилган резина тўп билан спортнинг ушбу турига меҳр қўйган, бироқ у отаси совға қилган тўпни йўқотиб қўйган. Кейинроқ Рейес Магос (Рейес Магос — испан халқи учун Қорбобо каби совғалар олиб келадиган шахс) унга илк чарм тўпни совға қилади.
Мактаб юлдузи
Иско мактабдаги танаффуслар вақтини дўстлари билан футбол ўйнашга бағишларди. Тушликдан кейин уйи яқинидаги майдонда футболни давом эттирар ва доим ёнида ўзининг тўпи бўларди. Унинг истеъдоди шу ерда сезила бошлади. Аввалига Ретамар футбол мактабига ёзилди, кейин “Атлетико Бенамиэл” жамоасида дебют қилди. Ушбу жамоа сафида турли ҳудудий мусобақаларда ажойиб ўйин кўрсатиб, кўплаб совринларга эга чиққан.
Мусобақада қатнашиш учун “ҳийла”
Ўша пайт Испанияда 7 ёшдан кичик болаларнинг турнирларда қатнашишига рухсат йўқ эди. Иско атиги 5 ёш бўлган. Шундай бўлса-да, мураббийи билан бирга унинг ёшини каттароқ қилиб кўрсатиб, ҳужжат тайёрлашади. Натижада у анча ёши катта футболчилар билан ўйнаб, улар орасида ҳам ажралиб турарди.
Зидан – илҳом манбайи
Иско болалигидан франциялик футбол афсонаси Зинедин Зиданнинг ўйинига қойил қоларди. Ҳар куни унинг финтларини, тўп билан ҳаракатларини такрорлашни машқ қилиб кўрар эди. Бу ҳаракатлар ўз самарасини берди – бугунги кунда мухлислар Искони “Magic Isco” деб аташади, бу унинг тўп билан жуда нозик ҳаракат қилишини кўрсатади.
Роналдиньо ва Ромарионинг таъсири
Зидан асосий кумири бўлса-да, Иско бразилиялик юлдузлар Ромарио ва Роналдиньонинг ҳам ўйин услубидан илҳом олган. Ромарионинг дрибблинги, Роналдиньонинг ўйинидаги ҳаракатлари – буларнинг барчаси Исконинг ўйин услубини шакллантирган.
Унинг уй ҳайвонлари исми машҳур футболчилар номига қўйилган
Исконинг машҳур футболчиларга бўлган муҳаббати шунчалик кучлики, у уй ҳайвонларига ўз кумирларининг исмини қўйган. Масалан, “Реал”га ўтганидан сўнг Луиш Фигонинг шарафига итига унинг исмини қўйган. Ҳозир ўзининг энг севимли кучукларидан бирига Месси деб ном берган.
Оила – энг катта таянч
Исконинг ҳаётида энг муҳим ўрин тутувчи инсонлари – турмуш ўртоғи Викториа Калдерон ва ўғли Франциско. У ўғлининг туғилган куни санасини қўлига татуировка қилиб ёздирган. Бундан ташқари, унда аёли ва ўғлини ифодаловчи икки фаришта татуировкаси ҳам мавжуд.
Болаликдаги майдон
Иско футболни жуда ҳам севади. У ҳозир ҳам ҳар бир ўйинга худди болаликдаги каби муҳаббат билан, ундан завқ олиш учун майдонга чиқади. Иско ёшликда дўстлари билан футбол ўйнаган кунларини ҳаётининг энг бахтли дамлари сифатида эслайди.
Падел – футболчининг иккинчи муҳаббати
Футболдан ташқари, Иско падел спортига ҳам ошно (падел — бу тенниснинг бир тури). Бўш вақтларида дўстлари билан ракетка олиб, падел ўйнаш учун боради. Кўп ҳаракатли ва тезкорлиги билан ажралиб турадиган ушбу спорт Искони ўзига ром қилган. Ҳар ҳолда, падел майдонида футболчи ўзининг севимли финтларини ишлатолмаса-да, бу ўйиндан катта завқ олади.
Дефенса Central маълумотлари асосида Жамшидбек Маҳмудов тайёрлади.
Изоҳ (0)