Тошкент вилояти Бўстонлиқ тумани Амирсой чорраҳасида Йўл ҳаракати хизмати ходимлари томонидан қоидабузар ҳайдовчи тўхтатилиб, унга чора кўрилди. Бу ҳақда вилоят ИИББ Йўл ҳаракати хавфсизлиги бошқармаси хабар берди.
Қайд этилишича, инспекторлар томонидан Gentra автомобилини тўхтатиб, унинг юкхонаси текширилган. Натижада юкхонадан қалбаки рақам топилган. У радарлардан қочиш учун водийдан Амирсойга боришда қалбаки рақамдан фойдаланган.
Ҳайдовчига нисбатан маъмурий баённома расмийлаштирилиб, транспорт воситаси вақтинча сақлаш учун жарима майдонига қўйилган, ҳайдовчи Бўстонлиқ тумани ИИБга терговга қадар текширув учун топширилган.
Қайд этилишича, Gentra ҳайдовчиси ушбу қалбаки давлат рақами белгиси орқали 64 марта қоидабузарлик содир этган.
Аввалроқ Хоразмда 12,5 минг нафар қоидабузар ҳайдовчидан 3,8 млрд сўмдан ортиқ қарздорлик ундирилгани тўғрисида хабар берилганди. Жаримани тўлашдан бош тортган қарздорларга тегишли бўлган 137 та автотранспорт воситалари жарима майдончасига жойлаштирилган.
Изоҳ (0)