Ўзбекистонда 2021 йил ўтган даврида онлайн-аукционлар орқали 168,7 миллиард сўмлик 83,2 мингдан зиёд «чиройли» авторақамлар сотилди. Бу ҳақда АОКАда Республика товар-хом ашё биржаси мутасаддилари иштирокида бўлиб ўтган матбуот анжуманида маълум қилинди.
Қайд этилишича, 2021 йилнинг 7 ойлик якунларига кўра биржа савдолари орқали 797,3 минг декалитр этил спирти, 12,6 минг тонна поливинилхлорид, 1225 тонна формалин ва 224 килограмм кумуш сотилди.
Ўзбекистон республика товар-хом ашё биржасининг барча савдо платформаларида тузилган битимларнинг умумий ҳажми 2020 йилнинг мос даврига нисбатан 46,7 фоизга ўсиб, қарийб 46,0 триллион сўмни ташкил қилди. Бунда тузилган битимлар ҳажмининг 87 фоизи биржа савдоларига, қолган қисми эса электрон тижорат савдо тизимлари, шу жумладан, кўргазма-ярмарка савдолари, электрон давлат харидлари, авторақам ва мобил рақам онлайн аукционларига тўғри келди.
Январь—июль ойларида электрон давлат харидлари бўйича тузилган битимларнинг умумий ҳажми 2020 йилга нисбатан деярли 2,4 баробарга ошиб, 4 триллион 670 миллиард 3 миллион сўмга тенг бўлди. Бунда бюджет ва корпоратив буюртмачилари маблағларининг тежалиши икки маротабага ўсиб, 840,6 миллиард сўмни ташкил қилди.
Кўриб чиқилаётган даврда «avtoraqam.uzex.uz» сайтида онлайн-аукционлар орқали 168,7 миллиард сўмлик 83,2 мингдан зиёд «чиройли» авторақамлар сотилди. Бунда, авторақамларнинг сотуви сон жиҳатдан 2,4 баробарга, ҳажми бўйича — 42 фоизга ўсди. Сотилган авторақамнинг энг паст баҳоси — 450,5 минг сўмни, энг қиммат авторақамнинг қиймати эса 441,5 миллион сўмни ташкил қилди. Тузилган битта битимнинг ўртача қиймати 2 миллион сўмга тенг бўлди.
Бундан аввал Ўзбекистонда исталган фуқаро UZB, ААА сериали авторақамларни аукцион орқали сотиб олиши мумкинлиги ҳамда Ўзбекистонга қалбаки авторақамлар олиб кирилаётгани аниқлангани ҳақида хабар берилганди.
Изоҳ (0)