Ўзбекистонда 2021 йилнинг ўтган тўққиз ойи даврида онлайн-аукционлар орқали 105,6 мингдан зиёд «чиройли» авторақамлар сотилди. Бу ҳақда республика товар-хом ашё биржасининг ҳисоботида маълум қилинган.
Қайд этилишича, 2021 йилнинг 9 ойлик якунларига кўра, Ўзбекистон республика товар-хом ашё биржасининг барча савдо платформаларида тузилган битимларнинг умумий ҳажми 2020 йилнинг мос даврига нисбатан 61,5 фоизга ўсиб, 61,5 триллион сўмдан ортиқни ташкил қилган.
Хусусан, кўриб чиқилаётган даврда «Avtoraqam.uzex.uz» вебсайтида онлайн-аукционлар орқали 221,1 миллиард сўмлик 105,6 мингдан зиёд «чиройли» авторақамлар сотилган. Бунда, авторақамларнинг сотуви сон жиҳатдан 1,7 баробарга, қиймати бўйича – 28,3 фоизга ўсган.
Сотилган авторақамнинг энг паст баҳоси – 450,5 минг сўмни, энг қиммат авторақамнинг қиймати эса 441,5 миллион сўмни ташкил қилган. Тузилган битта битимнинг ўртача қиймати 2,1 миллион сўмга тенг.
Бундан аввал Ўзбекистонда исталган фуқаро УЗБ, ААА сериали авторақамларни аукцион орқали сотиб олиши мумкинлиги ҳамда Ўзбекистонга қалбаки авторақамлар олиб кирилаётгани аниқлангани ҳақида хабар берилганди.
Изоҳ (0)