Ўзбекистонда онлайн аукцион орқали “чиройли” дея таъриф бериладиган авторақамлар қиммат нархларда сотилишда давом этмоқда. Масалан, ҳозир сотувда турган авторақамлардан бирининг бошланғич нархи 165 миллион сўм. Бу деярли битта Cobalt автомобилининг бозордаги нархига тенг.
Онлайн аукционга 24 октябрь куни чиқарилган 80 Х 777 ХХ давлат рақамининг бошланғич нархи 165 миллион сўм қилиб белгиланган. Кейинги энг яхши нарх учун эса 170 миллион сўм сўралмоқда. Рўйхатга олиш манзили Бухоро вилоятида экани қайд этилган рақам аукционда қанча нархга сотилиши ҳозирча номаълум. Балки бу ҳам яқинда қарийб 893 миллион сўмга (73 минг доллар) сотилган 01 777 RRR авторақами каби 5 та Cobaltнинг нархига сотилар.
Буюртма рақамлар рукни остида сотувга чиқарилган яна бир 75 З 222 ZZ авторақамининг бошланғич нархи ҳам 165 миллион сўм.
Рўйхатга олиш манзили Сурхондарё вилояти деб кўрсатилган навбатдаги 75 О 007 ОО авторақами ҳам худди шу бошланғич нарх билан сотувга чиқарилган.
“Шунинг учун ҳам ушбу давлат рақам белгиларининг бошланғич нархи 165 миллион сўм. Яъни битта янги Cobaltнинг нархи. Яшавор! “О 000 ОО” давлат рақам белгиси чиқса, битта самолёт нархи бўлса керак а”,—дея муносабат билдирилган каналда.
Аввалроқ Ўзбекистоннинг турли ҳудудларида фаолият олиб борувчи “Korzinka.uz” супермаркетлар тармоғи асосчиси ва раҳбари Зафар Ҳошимов битта авторақам салкам 600 миллион сўмга сотилганига муносабат билдирганди.
“Шахсан мен ҳеч қачон на телефон ва на автоуловда “чиройли” номерга эгалик қилишга қизиқмаганман. Аксинча, менга деса, бундай рақамлар қанча одамлар эсида кам қолса, эгасига шунча яхши. Лекин шу борада ўша номерни давлат томонидан сотилиши ва кимдир уни расман шундай пулга олишини ёмонламайман. Бир томондан, аввал ҳам шундай “блатной” номерлар норасман сотилган ёки “сендан угина, мендан бугина” йўсинида тақсимланган, фақат давлатга, элга ундан ҳеч қандай наф бўлмаган. Ҳозир мана ярим миллиарддан ортиқ пул нақд давлат ғазнасига тушди. Умид қиламиз, Ин Шаа Аллоҳ, бу маблағда ўша ҳамма танқид қилувчилар жон куйдираётган етимлару-камбағалларнинг ҳам улуши бор. Иккинчи томондан, шунақа номерни ҳавас қиладиган одам иштиёқи шу қадар баланд экан, яхшиямки у пулини номерни пора бериб олиш ўрнига ёки бошқа ҳар хил бехуда орзу хавас ўрнига тўлалигича давлат ҳисобига туширди. Пул эгаси ҳам ўзи, уни ишлатиши ҳам ўзининг иши ва бу каби ишлатиш натижасида фойда эл ҳисобига келгани учун, уни тоза исроф дейишга тилим қайрилмаяпти. Қанийди ҳамма бехуда харажатлар шу каби тўла давлат ҳисобига тушса эди, бюджет тўлиб, солиқлар ҳам қисқарармиди... Яна айтиб ўтай, номер эгасига ҳеч қандай алоқам йўқ”,—деб ёзган тадбиркор.
Эслатиб ўтамиз, 2022 йилнинг 6 май куни 50 777 ZZZ авторақами қарийб 669 миллион 600 минг сўмга сотилганди. Бу Марказий банк томонидан ўша пайтда белгиланган доллар курси (11 132,56 сўм) бўйича 60 минг доллардан ортиқни ташкил этган.
Изоҳ (0)