Онлайн аукционда 01 Q 001 QB автомобиль рақами қарийб 5 минг долларга сотилди

Авторақамлар онлайн аукционида 29 ноябрь куни савдога қўйилган бир неча рақам бошланғич нархидан бир неча баробар қимматга сотилди.

Аукцион савдоларини кузатган «Дарё» мухбирининг қайд этишича, айниқса, Тошкент шаҳри ва Бухоро вилоятида чиройли рақамлар учун кураш кескин кечган.

Куннинг энг қимматга сотилган рақамларидан бири 01 Q 001 QB бўлди. Ушбу авторақам 27 млн сўм бошланғич нарх билан савдога қўйилганди. Савдолар давомида унинг нархи 33 марта оширилди ва якунда 53 730 000 сўмга сотилди. Бу Марказий банк томонидан 29 ноябрь учун белгиланган доллар курси (10777,04 сўм) бўйича 4985 долларга тенг деганидир.

8 100 000 сўм бошланғич нарх билан савдога қўйилган 707, 070, 200 ва 808 рақамлари учун кураш ҳам кескин бўлди. 01 М 707 QB автомобиль рақамининг нархи 145 маротаба кўтарилди. Якунда рақам қарийб 2,5 баробарга кўтарилиб, 19 845 000 сўмга сотилди.

5 ноябрь куни савдога қўйилган 01 М 070 QB авторақами учун нарх таклиф қилишнинг охирги муддати 29 ноябрь соат 17:00 гача бўлганига қарамай, янги таклифлар ҳисобига рақам учун кураш бир неча соатга узайтирилди. Савдолар якунида ушбу рақам 19 359 000 сўмга сотилди.

01 Q 200 QB авторақами 16 848 000 сўмга, 01 Q 808 QB эса 16 200 000 сўмга сотилди.

707 ва 808 рақамлари Бухоро вилоятида ҳам савдога қўйилганди. Тошкент шаҳридан фарқли ўлароқ чиройли авторақамлар вилоятларда пастроқ қийматда аукционга чиқарилади. 2 700 000 сўм бошланғич нарх билан савдога қўйилган 80 L 707 RА автомобиль рақамининг нархи 326 маротаба кўтарилиб, 11 502 000 сўмга сотилди.

Бу Бухорода кун давомида энг қиммат сотилган авторақамлардан бири бўлди.

80 L 808 RА давлат рақами эса ғолиб учун 7 641 000 сўмга тушди.