29 январдан 4 февраль оралиғида ўзбекистонликлар авторақамлар учун аукцион орқали 18,8 млрд сўм сарфлагани маълум бўлди. Бу ҳақда “UzEx хабарлари” газетасида хабар берилди.
Маълум қилинишича, кўрилаётган давр мобайнида “аvtoraqam.uzex.uz” савдо тизимига жами 38 068 та автотранспорт воситалари учун рўйхатдан ўтказиш давлат рақами белгилари жойлаштирилган. Шундан 33 минг 869 таси жисмоний шахслар учун ва 4 199 таси юридик шахслар учун мўлжалланган.
29 январдан 4 февраль оралиғида 4 390 та авторақамлар бўйича аукцион савдолар амалга оширилган бўлиб, уларнинг жами суммаси 18 млрд 793,6 млн сўмни ташкил этди. Амалга ошган битимларнинг 92 фоиз улуши жисмоний шахсларга (17 млрд 257,8 млн сўмга тенг 4 184 та авторақам) ва 8 фоиз улуши юридик шахсларга (1 млрд 535,8 млн сўмга тенг 206 та авторақам) тўғри келади.
Тузилган битимларнинг биттаси бўйича ўртача қиймат 4,3 млн сўмни ташкил этиб, сотилган авторақамларнинг энг паст баҳоси 1,7 млн сўмни, энг қиммат авторақамнинг баҳоси эса 345,1 млн сўмни ташкил қилди.
Бундан ташқари, “аvtoraqam.uzex.uz” ахборот тизимида рўйхатдан ўтган талабгорлар сони 644 минг 90 нафарни ташкил этмоқда, шулардан 617 минг 498 нафари жисмоний шахслар ва 26 минг 592 нафари юридик шахсларга тўғри келади.
Изоҳ (0)