Ўзбекистон товар-хом ашё биржаси 2024 йилда сотилган “чиройли” автомобиль рақамларини асосан жисмоний шахслар сотиб олганини маълум қилди.
Бу ҳақда “Ўзбекистон республика товар-хом ашё биржаси” акциядорлик жамиятида ўтказилган матбуот анжуманида айтилган. 2024 йилда 195 мингдан зиёд авторақамлар онлайн аукционлар орқали сотилган.
Сотилган авторақамларнинг 97 фоизи жисмоний шахслар, 3 фоизи юридик шахслар томонидан харид қилинган. Сотилган авторақамларнинг энг паст баҳоси 1,7 млн сўмни, энг қиммат авторақамнинг қиймати эса 965,3 млн сўмни ташкил қилди.
Шунингдек, кўриб чиқилаётган даврда биржа орқали умумий қиймати 875,9 млн сўмдан ортиқ бўлган қарийб 64,3 мингта “яшил сертификатлар” сотилган. Биржада савдо иштирокчилари учун қўшимча қулайликлар яратиш мақсадида икки томонлама қарама-қарши аукциони ишга туширилди.
Икки томонлама қарама-қарши аукцион биржанинг савдо режими бўлиб, бозор нархларини аниқлашнинг янада самаралироқ усули ҳисобланади. Мазкур савдо режимида икки томон бир вақтнинг ўзида ўз нарх таклифларини беришлари мумкин. Бунинг натижасида рақобат нафақат харидорлар балки сотувчилар ўртасида ҳам кучайиб боради.
Биржа савдосининг янги режими биржа савдолари самарадорлигини ошириш ва товар бозорларида рақобат муҳитини ривожлантиришга хизмат қилади.
Юқори нархга сотилган “чиройли” авторақамлар
Бундан аввал авторақамлар онлайн аукционида сотувга қўйилган 01 888 BBB авторақами 965 миллион 250 минг сўмга сотилгани ҳақида хабар берилганди. Дастлаб 337 миллион 500 минг сўм бошланғич нарх билан савдога қўйилган бу авторақамнинг нархи аукцион тугаш вақтига қадар 965 миллион 250 минг сўмга кўтарилган.
Эслатиб ўтамиз, Ўзбекистонда 2023 йилда онлайн аукционлар орқали 87 мингдан зиёд авторақамлар сотилганди. Сотилган автомобиль рақамларининг жами қиймати 396,1 миллиард сўмни ташкил этган. Энг қиммат “чиройли” авторақам юридик шахсга 450 миллион сўмга сотилган.
Изоҳ (0)