Рақобат қўмитаси Ўзбекистонда умра хизматини лицензиясиз реклама қилган яна 4 та туроператор жаримага тортилганини маълум қилди.
Туроператорлар томонидан умра тадбирини ташкил этиш ва ўтказишга оид рекламаларнинг қонунийлиги ўрганилганда Бухоро, Жиззах вилоятлари ва Тошкент шаҳар ҳудудий бошқармалари томонидан жами 4 та (Nature Travel, “Муслим Файзи Обод”, Аl-Bukhayr Travel Tours, Naqqosh Tour МЧЖ) туроператорлар томонидан лисензия ҳужжатлари мавжуд бўлмаган ҳолда рекламалар жойлаштирилгани аниқланган.
Бу билан “Реклама тўғрисида”ги қонун талаблари бузилгани юзасидан белгиланган тартибда иш қўзғатилиб, якунлари юзасидан молиявий жарималар қўлланган.
Шунингдек, қўмитанинг Фарғона вилояти ва Тошкент шаҳар ҳудудий бошқармалари томонидан, жами 11 та (Аl Qaswа Ihlos, “Умра қумтепа”, “Марғилон Умра зиёрати”, “Фарғона Умра 2022”, “Файз Туризм”, “Зиёротул_Умра”, “Сух_Ҳаж Умра зиёрати”, Buxoriy Tour, Yuksak Travel Fargʻona Umra) Telegram каналлар маъмурлари ҳамда Emir Voyage МЧЖ томонидан берилган рекламаларда ҳам юқоридаги каби қонунчилик талаблари бузилиши юзасидан мансабдор шахслари маъмурий жавобгарликка тортилган.
Апрель ойида Ўзбекистонда умра хизматларини лицензиясиз реклама қилган 7 та туроператор жаримага тортилганди.
Умра тадбирларини ташкил этиш
2024 йил июлида Ўзбекистонда умра тадбирларини ташкил этиш ва ўтказиш лицензияланадиган фаолиятнинг алоҳида тури сифатида белгиланди. Ҳукумат қарори билан қуйидаги лицензия талаб ва шартлари жорий этилган. Лицензияга эга бўлмаган тадбиркорлик субъектлари томонидан умра хизматларини кўрсатганлик учун юридик шахсларга солинадиган жарималар миқдорлари БҲМнинг 200 баравари (75 миллион сўм) этиб белгиланган.
“Реклама тўғрисида”ги қонуннинг 16-моддасига мувофиқ ишлаб чиқарилиши ёки реализация қилиниши қонунда тақиқланган товарларни, шунингдек, ишлаб чиқарилиши ва (ёки) реализация қилиниши учун тегишли сертификатлари ва лицензиялари, мажбурий сертификатлаштириш гувоҳномалари ёки махсус рухсатномалари мавжуд бўлмаган товарларни реклама қилиш тақиқланган.
Изоҳ (0)