Raqobatni rivojlantirish va iste’molchilar huquqlarini himoya qilish qo‘mitasi umra xizmatlarini litsenziyasiz reklama qilgan 7 ta turoperator jarimaga tortilganini ma’lum qildi.
Turoperatorlar tomonidan umra tadbirini tashkil etish va o‘tkazishga oid reklamalarning qonuniyligi o‘rganilgan. Uning natijasiga ko‘ra Namangan, Navoiy, Farg‘ona, Xorazm, Toshkent viloyatlari va Toshkent shahar hududiy boshqarmalari tomonidan litsenziya hujjatlari mavjud bo‘lmagan holda reklamalar joylashtirgan jami 7 ta turoperatorga nisbatan “Reklama to‘g‘risida”gi qonun talablari buzilishi alomatlari bilan ishlar qo‘zg‘atilib, ishni ko‘rib chiqish yakunlari yuzasidan moliyaviy jarimalar qo‘llanilgan.
Ular: Emir Voyage, Makan United Travel Group, Ezofayz, Murabbiy Travel, Zaytun Tourism, Smrt Systems Company, Nazir Travel N1 MCHJlar.
Shuningdek, qo‘mitaning Namangan va Farg‘ona viloyatlari hududiy boshqarmalari tomonidan jami 5 ta turoperator mansabdor shaxslari hamda Telegram kanallar adminlari yuqoridagi kabi qonunchilik talablari buzilishi yuzasidan ma’muriy javobgarlikka tortilgan.
Litsenziyaga ega bo‘lmasdan reklama materiallari tarqatayotgan 12 dan ortiq axborot resursini yurituvchi shaxslarga aniqlik kiritish maqsadida Kiberxavfsizlik markaziga murojaat qilingan.
“Hurmatli fuqarolar, umra tadbirlarni amalga oshirishda firibgarlarga aldanib qolishdan ogoh bo‘lish va keyinchalik turli ko‘ngilsiz holatlarga tushib qolmaslik maqsadida xavfsiz, ishonchli va kafolatlangan xizmatlardan hamda tegishli litsenziyaga ega bo‘lgan turoperatorlar xizmatidan foydalanishni tavsiya etamiz”, deyiladi qo‘mita xabarida.
Raqobatni rivojlantirish va iste’molchilar huquqlarini himoya qilish qo‘mitasi noto‘g‘ri, ishonchsiz va shubhali reklama axborotlari berilgan holatlar kuzatilsa yoki bunday axborot tufayli zarar ko‘rgan fuqarolarni yagona ishonch (1159) raqamiga murojaat qilishni so‘radi.
Din ishlari bo‘yicha qo‘mita O‘zbekistonda so‘nggi ikki oyda o‘tkazilgan tekshiruvlarga ko‘ra, umra litsenziyasiga ega bo‘lmasdan ushbu xizmatni ko‘rsatayotgan 31 ta sayyohlik firmasi mas’ullariga nisbatan jinoyat ishi qo‘zg‘atilganini ma’lum qilgandi. Ushbu qo‘mita ham noqonuniy turfirma yoki turagentlardan ogoh bo‘lishga chaqirgandi.
O‘zbekistonda umra tadbirlarini tashkil etish
2024-yil iyulida O‘zbekistonda umra tadbirlarini tashkil etish va o‘tkazish litsenziyalanadigan faoliyatning alohida turi sifatida belgilandi. Hukumat qarori bilan quyidagi litsenziya talab va shartlari joriy etilgan. Litsenziyaga ega bo‘lmagan tadbirkorlik subyektlari tomonidan umra xizmatlarini ko‘rsatganlik uchun yuridik shaxslarga solinadigan jarimalar miqdorlari BHMning 200 baravari (75 million so‘m) etib belgilangan.
Izoh (0)