Ўзбекистонда икки фирма: Panorama Airways ва Gulbakhor Airways умра зиёратчиларига 25 млрд сўмлик зарар етказди. Бу ҳақда Рақобат қўмитаси хабар берди.
Қайд этилишича, Рақобат қўмитаси томонидан бугунги кунда интернет ва ижтимоий тармоқлар орқали умра сафарларига юбориш учун тегишли лицензия ва рухсатномаси мавжуд бўлмаган туроператорларнинг арзон нархда сотиш таклифлари асосида рекламалар қилинаётгани каби ҳолатлар кузатилмоқда.
Мисол учун, умра зиёратчиларига катта миқдорда, яъни 25 млрд сўмлик зарарни Panorama Airways ва Gulbakhor Airways фирмалари етказган бўлиб, алданиб қолган жабрланувчилар сони 2 558 нафарни ташкил этади.
Сурхондарё вилояти Bilolbek travel МЧЖ Жарқўрғон тумани филиали ходими Н.Ж. тегишли рухсатномасиз умра зиёратига юборишни ваъда қилиб, фуқаро М.А.нинг 14 млн 900 минг сўм миқдоридаги пулини алдов йўли билан олган.
Шунингдек, мазкур МЧЖнинг Бойсун туман филиали мутахассиси А.С. ҳам зиёрат учун фуқаро Х.М.нинг ишончига кириб, 2 200 АҚШ долларини фирибгарлик йўли билан қўлга киритган.
Юқоридаги ҳолатларга кўра, ҳуқуқни муҳофаза қилувчи органлар томонидан алдов йўли билан фуқаролар ишончига кириб, пулларини ўзлаштираётган, уларнинг хорижда сарсон бўлишига сабаб бўлаётган сайёҳлик фирмалари ва туроператорларига тегишли чоралар кўрилган.
Умра тадбирларини ташкил этиш ва ўтказишга оид хизматларни кўрсатиш билан боғлиқ туристик фаолият Вазирлар Маҳкамасининг 2017 йил 7 июндаги ҳамда 2024 йил 12 октябрдаги қарорлари асосида амалга оширилади.
Ўз навбатида, умра тадбирларини ташкил этиш ва ўтказишга оид хизматларни кўрсатишга рухсат берилган (лицензияга эга) 12 та туроператорлар рўйхати эълон қилинган. Тегишли лицензияга эга бўлмаган субъектлар томонидан ушбу хизматларни кўрсатиш тақиқланган.
“Реклама тўғрисида”ги қонуннинг 16-моддасига мувофиқ ишлаб чиқарилиши ёки реализация қилиниши қонунда тақиқланган товарларни, шунингдек, ишлаб чиқарилиши ва (ёки) реализация қилиниши учун тегишли сертификатлари ва лицензиялари, мажбурий сертификатлаштириш гувоҳномалари ёки махсус рухсатномалари мавжуд бўлмаган товарларни реклама қилиш тақиқланган.
Дин ишлари бўйича қўмита Ўзбекистонда сўнгги икки ойда ўтказилган текширувларга кўра, умра лицензиясига эга бўлмасдан ушбу хизматни кўрсатаётган 31 та сайёҳлик фирмаси масъулларига нисбатан жиноят иши қўзғатилганини маълум қилганди. Ушбу қўмита ҳам ноқонуний турфирма ёки турагентлардан огоҳ бўлишга чақирганди.
Ўзбекистонда умра тадбирларини ташкил этиш
2024 йил июлида Ўзбекистонда умра тадбирларини ташкил этиш ва ўтказиш лицензияланадиган фаолиятнинг алоҳида тури сифатида белгиланди. Ҳукумат қарори билан қуйидаги лицензия талаб ва шартлари жорий этилган. Лицензияга эга бўлмаган тадбиркорлик субъектлари томонидан умра хизматларини кўрсатганлик учун юридик шахсларга солинадиган жарималар миқдорлари БҲМнинг 200 баравари (75 миллион сўм) этиб белгиланган.
Изоҳ (0)