Uzum Market, Olcha, Goltr онлайн маркетплейсларида контрафакт маҳсулотлар сотилиши бўйича мониторинг ўтказилди, деб хабар бермоқда Адлия вазирлиги Интеллектуал мулк департаменти.
Қайд этилишича, Контрафакт маҳсулотларга қарши курашиш, уларнинг реализациясини олдини олиш ва ҳуқуқ эгаларининг ҳуқуқларини тиклаш мақсадида республика ҳудудида фаолият кўрсатаётган Uzum Market, Olcha, Goltr маркетплейслари ўрганиб чиқилди ва уларда мониторинг ўтказилди.
Мониторинг натижаларига кўра: Uzum Market’да 220 га яқин, Goltr ва Olcha’да эса 50 га яқин контрафакт маҳсулотлар савдога таклиф этилаётгани аниқланди.
Контрафакт маҳсулотлар асосан кийим-кечак, косметика воситалари ҳамда маиший техникаларда кўпроқ учрамоқда. Машҳур брендлар — Puma, Lacoste, Adidas, Chanel, Eclat, Gucci, Samsung, Bosch каби товар белгилари билан ишлаб чиқарилган маҳсулотлар сотувга таклиф этилмоқда.
Аниқланган ҳолатлар бўйича ҳуқуқ эгаларининг мурожаатларига асосан Uzum Market онлайн маркетплейсидан баъзи контрафакт маҳсулотларнинг савдосига чек қўйилди ва улар олиб ташланди.
Шунингдек, ҳозирда қолган ҳуқуқбузарликлар юзасидан ҳам ҳуқуқ эгаларига маълумотлар юборилган ва улар томонидан муносабат билдирилганидан сўнг тегишли таъсир чоралари қўлланилиши маълум қилинади.
Тошкент вилоятида 20 дан зиёд турли хорижий брендлар номи остида сифатсиз ҳамда қалбаки косметика ва парфюмерия воситаларининг яширин цехи фаолиятига чек қўйилган эди. Шунингдек, бир қатор жисмоний шахслар Nokia товар белгиси билан айнан бир хил бўлган контрафакт маҳсулот сотаётганликлари аниқланган эди.
Изоҳ (0)