Санкциялар Россия авиациясини фалажлади: бир йилда фақат битта самолёт ишлаб чиқарилган

Россия авиация корхоналари бу йил режалаштирилган 15 та тижорий самолётдан атиги биттасини етказиб берди. Санкциялар сабаб хорижий бутловчи қисмлар билан муаммо юзага келган, марказий банкнинг юқори фоиз ставкалари эса сармояларни чекламоқда. Бу ҳақда Reuters маълум қилди. 

Агентлик маълумотларига кўра, Россия авиакомпаниялари парки 700 дан ортиқ самолётдан иборат бўлиб, асосан Airbus ва Boeing моделларидан ташкил топган. Бироқ Украинага кенг кўламли босқин бошлаган 2022 йил февралидан буён мамлакат учун мазкур бозор ёпилган.

Россияликлар нафақат янги самолётлар ишлаб чиқариш, балки эскиларига техник хизмат кўрсатишда ҳам муаммоларга дуч келмоқда. Энг муҳим бутловчи қисмларни мураккаб ва айланма йўллар орқали импорт қилишга тўғри келяпти. 

“Бутловчи қисмлар базаси, технология, ишлаб чиқариш қувватлари, муҳандислар йўқ. Буларнинг барчасини нолдан яратиш учун ўн йиллар бўлмаса-да, йиллар керак бўлади”, деган Россия авиация саноатидаги манбалардан бири.

Яқинда содир бўлган жиддий ҳодисалар Россия учун ўз авиапаркининг жорий ҳолатини сақлаб қолиш осон бўлмаслигини кўрсатиб қўйди. Июль ойида 1976 йили ишлаб чиқарилган Ан-24 самолёти Амур вилояти ҳудудида ҳалокатга учради. Орадан бир неча кун ўтгач, мамлакатнинг энг йирик “Аэрофлот” компанияси хакерлар нишонига тушиб, натижада ўнлаб рейслар қолдирилди.

Агентликнинг ёзишича, авиация секторининг ички имкониятларга суянишга бўлган уринишлари умумий саноатнинг секинлашуви сабаб оқсамоқда. Purchasing Managersʼ Index маълумотларига кўра, июль ойида Россияда саноат ишлаб чиқариши 2022 йил мартидан бери энг тез суръатда пасайган. 

Юқори фоиз ставкалари автомобиль ишлаб чиқариш ҳажмининг камайишига, кўмир секторидаги банкротликка, металл ва нефть маҳсулотлари каби товарлар экспортининг секинлашишига ҳамда самолёт ишлаб чиқариш режаларининг бажарилмаслигига олиб келди. Расмийлар ва бизнес вакилларининг айтишича, бу омиллар иқтисодий ўсишни орқага тортмоқда.

Учинчи томонлар орқали схема

Ғарб санкциялари жорий этилганидан буён Россия Boeing ва Airbus самолётлари учун қарийб 190 миллион долларлик эҳтиёт қисмлари харид қилишга муваффақ бўлди. Уларнинг аксарияти Туркия, БАА ва Хитойдан олиб келинган.

Асосий етказиб берувчи Дубайда жойлашган Ats Heavy Equipment & Machinery компанияси бўлиб, у бир йилдан сал кўпроқ вақт ичида Россияга 700 дан ортиқ юк жўнатмасини амалга оширган.