Россия парламентининг қуйи палатаси Россия компанияларига товарларни муаллифлик ҳуқуқи эгасининг рухсатисиз импорт қилиш имконини берувчи қонунни қабул қилди, деб ёзади Meduza.
Тегишли қонун лойиҳаси Россия ҳукумати томонидан тайёрланган эди. 21 июнь куни Давлат думаси уни иккинчи ва учинчи ўқишларда дарҳол қабул қилди.
Давлат думаси томонидан маъқулланган ҳужжат «интеллектуал фаолиятнинг товарларда ифодаланган натижаларидан ва бундай товарлар маркировка қилинган индивидуаллаштириш воситаларидан фойдаланиш қонунни бузиш ҳисобланмаслиги»ни кўзда тутади.
Шу тариқа, параллель импорт — мамлакатга муаллифлик ҳуқуқи эгаси ёки ишлаб чиқарувчининг рухсатисиз товарлар олиб кириш қонунийлаштирилди. Қонун амал қилиши фақат Россия Саноат ва савдо вазирлиги томонидан май бошида тасдиқланган товарларнинг муайян тоифаларига тегишли бўлади. Ушбу рўйхатга баъзи брендлар (масалан, Bentley, Apple, Siemens, Dyson), шунингдек, товарлар тоифалари (масалан, темир йўл локомотивлари, қайиқлар, кўчатлар ва гуллар) кирди.
Россия Украинага бостириб кирганидан кейин юзлаб чет эл компаниялари Россияда ўз фаолиятини тўхтатиб туриши ёки мамлакатдан бутунлай кетиши ҳақида эълон қилди. Март охирида Россия ҳукумати ўз қарори билан параллель импортга рухсат берди, аммо тегишли қонун кучга кирмагунича, Россия компаниялари контрафакт маҳсулотлар олиб киргани учун жавобгарликка тортилиши мумкин.
Изоҳ (0)