Хитойда расмий ҳужжатлар ҳажмига қатъий чеклов жорий қилинди. Энди улар 5000 иэроглифдан (тахминан уч бет) ошмаслиги керак. Бу ҳақда Financial Times хабар берди.
Маълум қилинишича, бу ҳукуматнинг бюрократизм ва расмиятчиликка қарши кенг кўламли кампаниянинг бир қисми. Янги тартиб асосида амалдорлар матнни қисқа, аниқ ва лўнда ёзиши керак. Идораларга нафақат ҳисобот ҳажмини, балки эълон қилинадиган ҳужжатларнинг умумий сонини ҳам камайтириш буюрилган. Агар ҳажм оширилиши зарур бўлса, буни ёзма равишда асослаб бериш шарт бўлади.
Янги қоида йиғилишларга ҳам тааллуқли: уларни қисқартириш, маърузалар давомийлигини бир соат билан чеклаш лозим. Иштирокчилар сони қатъий назорат қилиниши керак.
Бу Хитой раиси Си Цзиньпин олиб бораётган кампаниянинг навбатдаги босқичи бўлиб, мақсад оғир бюрократик аппарат юкини камайтириш ва эътиборни иқтисодий ривожланишга қаратишдир, дейилади хабарда.
Кампания ёз бошида жорий этилган бошқа интизомий чоралар ортидан бошланди. Ўша пайтда амалдорларнинг зиёфатлар, алкоголь ва чекишга сарфлайдиган харажатларига чеклов қўйилган эди. Хитой матбуотида бу амалиёт “гастрономик коррупция” деб номланган.
FТ маълумотларига кўра, эндиликда баъзи ҳудудларда давлат хизматчилари норасмий учрашувларда уч кишидан ортиқ иштирок этиш учун раҳбариятдан рухсат олиши шарт. Айрим ҳолларда эса уларни кечки алкоголь тестларига чақиришади. Буларнинг бари Си Цзиньпин ўн йилдан ортиқ вақтдан бери олиб бораётган коррупцияга қарши курашнинг кучайиши билан бирга кечмоқда.
Назорат бошқа соҳаларда ҳам кучаймоқда. Янги қарорда 21 та банд белгиланган бўлиб, улар амалдорларнинг иш самарадорлигини баҳолаш тизимини ислоҳ қилишдан тортиб, уларни вақтинча бошқа лавозимларга ўтказиш тартибини ўзгартириш ва давлат идоралари ишлаб чиқадиган мобил иловалар сонини чеклашгача қамраб олади.
Изоҳ (0)