Буюк Британиянинг ядро бомбалари сақланадиган энг махфий базаларидан бирида эски қувурларнинг етарлича таъмирланмагани сабаб денгизга радиоактив сув оқиб чиққан. Бу ҳақда The Guardian хабар берди.
Расмий ҳужжатларга кўра, қироллик денгиз флотининг ядро бомбалари сақланадиган базасида эскирган қувурлар бир неча бор ёрилиб, радиоактив сув Глазго яқинидаги Лоч Лонг қўлтиғига оқиб тушган.
Шотландия Ғарбидаги Коулпорт базаси Буюк Британиядаги энг ҳимояланган ва махфий ҳарбий объектлардан бири бўлиб, у Қироллик денгиз флотининг сувости кемаларидан учириладиган Trident ракеталари учун ядровий каллакларини сақлайди.
Шотландия Атроф-муҳитни муҳофаза қилиш агентлиги (СEPA) маълумотларига кўра, воқеа юз берган вақтда базадаги компонентларнинг қарийб ярмида фойдаланиш муддати тугаган эди. СEPA, ҳодисага “таъмирлашдаги камчиликлар” сабаб бўлганини ва натижада ядровий каллакларда ишлатиладиган тритий изотопи денгизга сизиб чиққанини билдирди.
2022 йилги ҳисоботида СEPA Қироллик денгиз кучларини омбор ҳудудидаги жиҳозларга етарлича эътибор қаратмасликда айблаган. Боиси 1 500 та эскирган сув қувурларини алмаштириш режаси “оптимал эмас” дея баҳоланган эди.
Ҳодисани яширишга уринишлар
Ҳукумат ва қуролли кучлар ҳодисани яширишга уринган. Бироқ маълумотлар сирли текширув ҳисоботлари ва электрон хатлар орқали фош бўлган. Натижада Шотландия Ахборот бўйича комиссари Девид Хемилтон журналистларнинг сўровларидан сўнг ҳодисани очиқлашга мажбур бўлган.
Британия Мудофаа вазирлиги буни “миллий хавфсизлик” важи билан махфий сақлашга уринди, бироқ комиссар ҳужжатларнинг ошкор бўлиши мамлакат хавфсизлигига эмас, балки “обрўга” таҳдид солишини таъкидлади.
Изоҳ (0)