Жиноят ишлари бўйича Андижон туман суди қарорига асосан «Head&shoulders» ва «Clear» брендининг контрафактини ишлаб чиқараётган корхона жазога тортилди. Бу ҳақда «Дарё»га Андижон вилоят адлия бошқармаси хабар бермоқда.
Маълум қилинишича, 2022 йилнинг 27 июнидан 5 июлига қадар Андижон вилоятидаги йирик бозорлар ва савдо комплексларида контрафакт маҳсулотлар ишлаб чиқарилиши ва сотилишининг олдини олиш бўйича профилактика тадбирлари ўтказилган.
Мазкур тадбирлар давомида бир нечта савдо дўконларида «Head&shoulders» МГУ, «Clear» МБХ гувоҳномалари билан давлат рўйхатидан ўтказилган товар белгиларига харидорни чалғитиб юбориш даражасида ўхшаш бўлган «hedn&shollders», «Cleer»номли шампунь маҳсулотлари сотилаётганлиги ҳамда маҳсулот қадоғида «АОС» масъулияти чекланган жамияти томонидан ишлаб чиқарилаётганлиги қайд этилганлиги аниқланган.
« ‘Товар белгилари, хизмат кўрсатиш белгилари ва товар келиб чиққан жой номлари тўғрисида’ги қонунининг 3-моддасига кўра, товар белгиси ва хизмат кўрсатиш белгиси бу бир юридик ва жисмоний шахслар товарлари ва хизматларини бошқа юридик ва жисмоний шахсларнинг шу турдаги товарларидан фарқлаш учун хизмат қиладиган, белгиланган тартибда рўйхатдан ўтказилган белгилар эканлиги қайд этилган.
Шунингдек, мазкур қонуннинг 26-моддасига кўра, товар белгисини ёки шу белги билан белгиланган товарни рухсат берилмаган тарзда тайёрлаш, қўллаш, олиб кириш, савдога таклиф этиш, сотиш, ўзгача тарзда фуқаролик муомаласига киритиш ёки уларни шу мақсадда сақлаш ёхуд улар билан адаштириб юборадиган даражада айнан ўхшаш бўлган бир хилдаги товарларни белгилаш товар белгисига доир мутлақ ҳуқуқни бузиш деб эътироф этилиши ҳамда 27-моддасида товар белгисидан ёки адаштириб юбориш даражасида у билан ўхшаш бўлган белгидан товарларда, товарларнинг этикеткаларида, ўровларида қонунга зид равишда фойдаланилганда улар контрафакт ҳисобланиши белгиланган», — дейди вилоят адлия бошқармаси бош маслаҳатчиси Муроджон Жалолдинов.
«АОС» МЧЖ раҳбари Ўзбекистон Республикасида ҳуқуқий муҳофаза олган товар белгиларига адаштириб юбориш даражасида ўхшаш белгилардан фойдаланган ҳолатда шампунь маҳсулотларини ишлаб чиқаргани ҳамда сотувга таклиф қилганлиги сабабли Маъмурий жавобгарлик тўғрисидаги Кодекснинг 177-моддаси 1-қисмида назарда тутилган ҳуқуқбузарликни содир этганликда айбдор деб топилган. Унга нисбатан базавий ҳисоблаш миқдорининг 10 баробари, яъни уч миллион сўм жарима жазоси тайинланган.
Аввалроқ Tide товар белгиси (бренди) га ўхшаш бўлган «Тиде» номли контрафакт кир ювиш кукунлари сотилаётгани аниқлангани ва ишлаб чиқарилиши тўхтатилгани ҳақида хабар берилганди.
Мавзуга доир: Tide брендининг контрафакти аниқланди
Изоҳ (0)