Uzum Market, Olcha, Glotr onlayn marketpleyslarida kontrafakt mahsulotlar sotilishi bo‘yicha monitoring o‘tkazildi, deb xabar bermoqda Adliya vazirligi Intellektual mulk departamenti.
Qayd etilishicha, Kontrafakt mahsulotlarga qarshi kurashish, ularning realizatsiyasini oldini olish va huquq egalarining huquqlarini tiklash maqsadida respublika hududida faoliyat ko‘rsatayotgan Uzum Market, Olcha, Glotr marketpleyslari o‘rganib chiqildi va ularda monitoring o‘tkazildi.
Monitoring natijalariga ko‘ra: Uzum Market’da 220 ga yaqin, Glotr va Olcha’da esa 50 ga yaqin kontrafakt mahsulotlar savdoga taklif etilayotgani aniqlandi.
Kontrafakt mahsulotlar asosan kiyim-kechak, kosmetika vositalari hamda maishiy texnikalarda ko‘proq uchramoqda. Mashhur brendlar — Puma, Lacoste, Adidas, Chanel, Eclat, Gucci, Samsung, Bosch kabi tovar belgilari bilan ishlab chiqarilgan mahsulotlar sotuvga taklif etilmoqda.
Aniqlangan holatlar bo‘yicha huquq egalarining murojaatlariga asosan Uzum Market onlayn marketpleysidan ba’zi kontrafakt mahsulotlarning savdosiga chek qo‘yildi va ular olib tashlandi.
Shuningdek, hozirda qolgan huquqbuzarliklar yuzasidan ham huquq egalariga ma’lumotlar yuborilgan va ular tomonidan munosabat bildirilganidan so‘ng tegishli ta’sir choralari qo‘llanilishi ma’lum qilinadi.
Toshkent viloyatida 20 dan ziyod turli xorijiy brendlar nomi ostida sifatsiz hamda qalbaki kosmetika va parfyumeriya vositalarining yashirin sexi faoliyatiga chek qo‘yilgan edi. Shuningdek, bir qator jismoniy shaxslar Nokia tovar belgisi bilan aynan bir xil bo‘lgan kontrafakt mahsulot sotayotganliklari aniqlangan edi.
Izoh (0)