АҚШда Pizza Hut франшизасининг собиқ эгаси ўзини Худонинг элчиси деб таништирган фирибгарларга 60 миллион доллардан ортиқ пул берди. Бу ҳақда New York Post хабар қилмоқда.
Маълум қилинишича, Оклахома федерал судига 91 ёшли “тақводор христиан” ва собиқ тадбиркор Жин Бикнеллни диний усуллар билан алдаб, ўзларини Худонинг элчилари сифатида кўрсатиб, 60 миллион долларга чув тушурганлар ҳақида даъво аризаси топширилган.
Нашрнинг ёзишича, Флоридада истиқомат қилган Бикнелл Оклахома штатининг Винита шаҳрида жойлашган American Heartланд мавзули боғи лойиҳаси билан боғлиқ кенг кўламли фирибгарлик схемасига аралашган. Диснейлендга рақобатчи сифатида мўлжалланган лойиҳа амалга ошмаган. Замонавий аквапарк, меҳмонхона ва кемпингга эга бўлиши керак бўлган боғ ўрнига фақат шағал йўл ва девор пайдо бўлган.
Даъвогарнинг таъкидлашича, фирибгарлик бир неча йил давомида “илоҳий ваҳийлар” ниқоби остида амалга оширилган. Ишнинг асосий айбдорлари сифатида Миссуридан келган воиз Ларри Уилҳайт, шунингдек, тадбиркорлар Ричард Силанскас ва Стивен Хедрик кўрсатилган. Улар Бикнеллга гўёки Худодан келган электрон хабарлар юбориш орқали “руҳий таъсир ўтказиш”да айбланмоқда.
Суд ҳужжатларида айтилишича, жиноятчилар “Бикнеллни Худонинг иродасини бажараётганига ишонтирган” ва уни ер сотиб олиш ҳамда лойиҳани ривожлантириш учун миллионлаб сармоя киритишга ундаган. Pizza Hut франшизасининг собиқ эгаси, камтар оиладан чиққан Бикнелл боғнинг илоҳий вазифасига ишониб, унга бутун мол-мулкини сарфлаган.
Бироқ, даъво аризасида таъкидланишича, маблағлар мақсадсиз ишлатилган. Тергов маълумотларига кўра, пулларнинг бир қисми айбланувчилар ва уларнинг оила аъзоларининг шахсий эҳтиёжларига сарфланган. Натижада, бир неча йил ичида лойиҳа дастлабки ер қазиш ишларидан нарига ўтмаган.
Бикнеллнинг адвокатлари фирибгарлик схемаси унинг соғлиғига жиддий зарар етказганини таъкидламоқда. Кекса эркак инсульт ўтказган, шунингдек, унга оғир руҳий бузилиш ташхиси қўйилган.
Даъвогар суд ҳайъати тайинланишини ва миқдори кўрсатилмаган зарар қопланишини талаб қилмоқда.
Изоҳ (0)