Украина президенти Владимир Зеленский Германия бош вазири Фридрих Мерц билан суҳбат чоғида Владимир Путин билан учрашувнинг турли форматлари муҳокама қилинаётганини билдирган. Бу ҳақда УНИАН агентлиги хабар берди.
Зеленскийнинг қайд этишича, Украина Европанинг бир қисми, шу сабабдан уруш Европа ҳудудларида бўлаётгани айтилмоқда.
Шунингдек, Украина етакчиси мамлакат Европа Иттифоқига аъзо бўлиш учун музокаралар жараёнида эканлигини яна бир бор таъкидлаган:
“Украина ва Германия урушни имкон қадар тезроқ, муносиб тинчлик шартлари асосида якунлаш зарурлигини бирдек англайди. Бу урушнинг якунланиши бўйича шартлар Европа учун ўн йилликларга етарли хавфсизлик шароитларини белгилайди.
Уруш айнан Европада кечмоқда ва Украина — Европанинг ажралмас қисмидир. Биз аллақачон Европа Иттифоқига аъзо бўлиш бўйича музокаралар ўтказмоқдамиз. Шунинг учун Европа ушбу жараёнларнинг бевосита иштирокчисига айланиши лозим”, деган Зеленский.
Таъкидланишича, Америка Қўшма Штатлари, Европа ва Украинанинг хавфсизлик масалалари бўйича масъул шахслари тинчлик масаласида қарашларини мувофиқлаштириш учун онлайн учрашув ўтказади.

Зеленскийнинг сўзларига кўра, Украина ва Россия ўртасида икки марта музокара ўтказилса, учинчи учрашув АҚШ иштирокида бўлиши мумкин:
“Тинчлик йўлида етакчилар даражасидаги учрашувларнинг турли потенциал форматлари муҳокама қилинди: иккита икки томонлама ва битта уч томонлама учрашув ташкил қилиниши мумкин. Украина музокаралардан чўчимайди ва Россия томонининг ҳам шундай жасорат билан ёндашишини кутмоқда. Урушни якунлаш вақти келди. Ёрдам бераётганларнинг барчасига раҳмат”, деган Украина етакчиси.
Манбанинг ёзишича, Зеленский урушни якунлаш бўйича учта қадамни санаб ўтган: Россия томонидан қотилликларни тўхтатиш, узоқ муддатли тинчлик учун етакчилар даражасида учрашувлар ўтказиш, Украина учун узоқ муддатли хавфсизликни кафолатлаш.
The New York Timesънинг ёзишича, АҚШ президенти Дональд Трамп Россия президенти Владимир Путин билан шахсан учрашишни режалаштирмоқда. Шундан сўнг, Трамп Зеленский ва Путин иштирокида музокара ўтказишни мақсад қилган.
Кремль баёнотига кўра, Россия ва АҚШ Трамп билан Путин учрашувига тайёргарликни аллақачон бошлаб юборган. Бундан ташқари, Трампнинг махсус вакили Стив Уиткофф Москвадаги ташрифи давомида Путин, Трамп ва Украина президенти Владимир Зеленский иштирокида уч томонлама учрашув ўтказиш ғоясини илгари сурган. Бироқ Москва бу борада ҳеч қандай расмий изоҳ бермаган.
Изоҳ (0)