Ҳиндистон ҳукумати 27 июнь куни мамлакат шимолидаги Жамму тумани авиабазасида содир этилган терактда учувчисиз учиш воситаларидан фойдаланилганини расман тасдиқлади. Жамму ва Кашмир иттифоқ ҳудуди полициясининг раҳбари Дилбагх Сингх бу ҳақда журналистларга маълум қилди, деб ёзади «ТАСС».
«Жамму ҳаво кучлари базасига қилинган ҳужум террорчилик ҳаракати эди. Жамму аэродромидаги иккала портлашда ҳам бомба ортилган дронлардан фойдаланилган», — деди Сингх NDTV телеканалида.
Расмийларнинг ахборотига кўра, бу Ҳиндистондаги муҳим нуқталарни нишонга олиш учун террорчиларнинг масофадан туриб бошқариладиган учувчисиз учар қурилмалардан биринчи марта фойдаланиши.
28 июнь куни Покистон билан чегарадан 14 километр узоқликдаги аэропортда содир этилган қуввати паст портлашлар оқибатида Ҳиндистон ҳарбий ҳаво кучларининг икки ходими енгил жароҳат олди. Расмий маълумотларга кўра, биринчи портлаш бинолардан бирининг томига зарар етказган, иккинчи портлаш ерда содир бўлган ва вайронагарчилик келтирмаган.
Расмийларнинг айтишича, дронлар қаердан учирилгани ҳали номаълум, уларнинг парвоз йўлини аниқлаш бўйича текширув олиб борилмоқда. Полиция ҳужум ортида қўшни Покистонда жойлашган экстремистлар турибди деб тахмин қилмоқда. Аввалроқ экстремистлар қурол-яроғ ва ўқ-дориларни узатишда дронлардан фойдаланаётгани ҳақида хабар берилган эди. Хусусан, улар сўнгги бир йил ичида учувчисиз учар қурилмалар ёрдамида АК-47 автоматлари, тўппонча ва милтиқларни қўшни ҳудудга етказиб беришга уриниб келган. Аммо илгари Ҳиндистонда террорчилик ҳужумлари учун дронлардан фойдаланилмаган.
Кашмир ҳудуди 1947 йилдан бери Ҳиндистон ва Покистон ўртасида зиддиятли мавзу бўлиб қолмоқда, ўша йили Британиядан мустақил бўлган Ҳиндистон диний йўналиш бўйича икки давлатга бўлинганди. Айни пайтда минтақада давлат чегараси йўқ: унинг ҳудуди назорат чизиғи билан бўлинган. Ҳудуднинг Ҳиндистон қисмидаги гуруҳлар мамлакатдан ажралиб чиқиш тарафдори. Нью-Деҳли қўшни Покистонни экстремистларни қўллаб-қувватлаётганликда айблаб келади; Исломобод эса бу айбловларни рад этади.
Изоҳ (0)