Кўпчилик машҳурлар бойлик ва мустақил ҳаёт тимсоли сифатида тасаввур қилинади. Аммо баъзиларининг ҳаёт йўли бунинг аксини кўрсатади. Кимдир пулни тежашни, кимдир эса оилавий илиқликни афзал кўриб, вояга етганига қарамай ота-онаси билан яшашда давом этади. Гарчи ота-она билан доимий яшаш шарқ мамлакатлари халқи учун одатий ҳол бўлса-да, ғарбда бунга ўзгача нигоҳ билан қаралади. Қуйида яқин қариндошлари билан узоқ вақт бирга яшашни танлаган машҳурлар ҳақида сўз юритамиз.
Майкл Б. Жордан
Машҳурлигига қарамай, Майкл Б. Жордан ота-онаси билан 32 ёшигача яшаган ва бу ҳақида очиқчасига гапиришдан уялмаган. Унинг мухлислари актёрни ота-она қарамоғидан чиқиб кета олмайдиган, уларга ҳаддан ташқари боғланиб қолган, деб ҳисоблаган. Кунларнинг бирида Жордан Опра Уинфри шоусига онаси, холаси, амакиси ва ҳатто жиянлари билан бирга ташриф буюрган. Майкл ҳеч тортинмасдан уларни томошабинларга таништирган.
Зендая
Зендаянинг яқинлари айтишича, у 21 ёшигача ота-онасининг уйидан кетишга журъат этмаган. Вояга етганига қадар ҳам у мустақилликка шошилган исёнкор ўсмир бўлмаган. Актриса ота-онаси билан яшашининг бир неча сабабини қуйидагича тушунтирган: бу пулни тежаш, яқинлар ёрдамидан фойдаланиш ва қулайлик ҳисси эди.
“Биласизми, ота-она билан яшаш менга тинчлик ва осойишталик ҳиссини беради. Улар доим менга ҳар ишда ёрдам беради: тонгда уйғотишади, иш жойигача бепул олиб бориб қўйишади, мазали овқатлар тайёрлаб беришади. Шундай экан, уйдан алоҳида чиқиб кетишимдан не маъно?”, деган эди актриса интервьюлардан бирида.
Тейлор Лотнер
Тейлор Лотнерни мустақил бўлишга ва ота-онасидан алоҳида яшашга фақатгина оила қуриш истаги мажбур қилган. Актёр “Сумерки” фильмида суратга тушиш чоғида ҳам ота-онасидан алоҳида яшаш керак деб ҳисобламаган. Бу вақтда у бор вақтини фақат карьерасига бағишлаган. Атрофдагилар унинг шунчаки пулни тежаётганини, ижарага маблағ сарфлашни истамаганини ва банкда жамғариб бораётганини айтган. Актёрнинг ўзи эса бундай турмуш тарзи унга ёқишини билдирган. Масалан, у онасига газон ўришга ёрдам беради ва бошқа уй юмушларини ҳам оиласи билан бажаради.
“Мен боғдаги ишларни бажараман, ахлат ташлайман ва идиш-товоқ ҳам ювавераман”, дейди актёр.
Женнифер Лоуренс
Женнифер Лоуренснинг ҳаётида ҳам шунга ўхшаш ҳолат кузатилган. Актриса тўйига қадар ота-онаси билан яшаган. Мухлислар ҳайрон бўлишар эди: “Ҳаёт-мамот ўйинлари” учун олган улкан гонорарлар унга шахсий уй сотиб олишга етмаяптими? Бироқ ҳақиқат бошқача бўлиб чиқди. Лоуренс ўзи ва ота-онаси учун умумий уй сотиб олган, чунки катта ҳовлида ёлғиз яшашни бефойда ва ноқулай деб ҳисоблайди:
“Мен бунчалик кўп хоналари бўлган уйда ёлғиз яшаб нима қиламан? Ҳар куни ҳар хил хонада ухлашим керакми?”, деган эди у интервьюда кулиб.
Ким Кардашьян
Ўзининг мустақиллиги ва катта даромадларига қарамай, Ким Кардашьян ҳам вояга етганида вақтинча ота-онаси уйига қайтишга қарши бўлмаган. Унинг қизи туғилгандан кейин Кардашьян ота уйига кўчиб ўтган.
Изоҳ (0)