Голливуд юлдузларининг келишган тансоқчилари (фото)

Машҳурлар тансоқчи ёллаётганида нафақат бақувватлигини, балки уларнинг кўринишини ҳам эътибордан қочиришмайди.

Кайли Женнер

Тим Чанг тан соқчилар орасида энг кўп муҳокамаларга сабаб бўлганлардан бири. Instagram саҳифасига турли саволлар ва шарҳлар ёғдирилганидан сўнг, у аккаунтидаги барча фотосуратларини ўчириб ташлаган. У асосан Кайли Женнерни ҳимоя қилади, аммо Ким ва Кортни Кардашьянда ҳам бир мунча вақт ишлаган. Ундан аввал Кайлининг тансоқчиси Лос-Анжелес полицияси ходими бўлган.

Тим Чанг 2018 йилда рэпер Травис Скоттдан дунёга келган Кайли Женнернинг қизи — Сторми Уэбстернинг ҳақиқий отаси деб гумон қилинган. Кейин у барча айбловларни рад этиб, Кайли, Травис ва уларнинг қизига ҳурмат билан муносабатда бўлишини ва унинг оила билан алоқаси фақат хизмат юзасидан эканини қўшимча қилган.

Женнифер Лопес

Голливуд юлдузи ўзини ҳимоя қилиш учун энг «чидамли» одамларни танлайди. Женниферни соқчилар танлашда жуда омадли деб бўлмайди. Бир сафар чегарадан ўтаётганларида тансоқчисининг пайпоғида тақиқланган модда борлиги маълум бўлган, хонанда ўша заҳотиёқ уни ишдан бўшатган.

Хонанданинг севгилиси, бейсболчи Алекс Родригезнинг айтишича, уни доим Женнифернинг ҳайдовчиси билан адаштириб қўйишади. «Бу ҳаётимдаги энг камситувчи ҳолатлардан бири, — дейди Алекс интервьюсида. — Мен ўзимни ажойиб спортчи деб ҳисоблайман, лекин Лопес билан бирга юрганимда папарацсилар уни суратга олишларига халақит бераётганимни айтиб бақиришади».

Ким Кардашьян

Келишган Паскал Дюве Париждаги талончилик пайтида Кимни ҳимоя қила олмаган тансоқчи сифатида танилган. Бу воқеа 2016 йилда содир бўлган. Модель меҳмонхонадаги хонасида ёлғиз қолганида полиция кийимидаги ўғрилар қурол билан бостириб кирган. Кардашьянни боғлаб, 10 миллион долларлик заргарлик буюмларини ўмарган. Бу вақтда Паскал Дюве опа-сингиллар Кортни Кардашьян ва Кендалл Женнер билан тунги клубда бўлган. Ким ходимининг бепарволиги учун хавфсизлик компаниясини судга берган. Бу воқеадан сўнг Ким ҳеч ким унинг уйига яқинлашмаслиги учун ўнлаб соқчи ёллаган.

Ҳайди Клум

47 ёшли германиялик супермоделни келишган ва ёш тансоқчилар ҳимоя қилади. Унинг турмуш ўртоғи, мусиқачи Том Каулитс ундан 16 ёш кичик, моделнинг тансоқчилари олдида доим ёш боладек кўринади.

Миш-мишларга қараганда Ҳайди қайсидир тансоқчиси билан илиқ муносабатда бўлган. Аммо орадан бироз вақт ўтгач, унга ижодкор ва иқтидорли эркаклар кўпроқ ёқишини тушунган ва муносабатларга нуқта қўйган. Албатта, бу воқеадан сўнг модель тансоқчисини ўзгартирган.

Женнифер Лоуренс

Женнифер Лоуренс кўп йиллар давомида бир неча тансоқчилар билан ҳамкорлик қилган. Тансоқчиларидан бири Грег Ленц 2013 йилдан бери унга хизмат қилади. Грегнинг айтишича, илгари у модель бўлиб ишлаган, шунингдек, Колорадо университетида архитектура йўналиши бўйича таҳсил олган. Маълум бўлишича, у тансоқчи бўлишни хаёлига ҳам келтирмаган, аммо Лоуренснинг ёрдами билан таниқли одамга айланди. Шу билан бирга, Грег оилали экани ва актриса билан ҳеч қачон шахсий муносабатда бўлмаганини таъкидлайди.