Ўзбекистонда қатор давлат ва жамоат ташкилотлари, медиа соҳаси экспертлари иштирокида соҳани тартибга солувчи тўғридан тўғри амал қиладиган яхлит қонун лойиҳаси ишлаб чиқилди. Бу ҳақда 7 май куни Олий Мажлис Қонунчилик палатасининг Инновацион ривожланиш ва ахборот технологиялари масалалари қўмитасида онлайн-платформалар фойдаланувчилари ҳуқуқлари, соҳада юзага келаётган ижтимоий муносабатлар, замонавий чақириқлар муҳокамасига бағишланган давра суҳбатида маълум қилинди.
Давра суҳбатида Ўзбекистонда ҳозир очиқлик сиёсати даврида интернет ва ижтимоий тармоқлар фуқароларнинг ахборотга бўлган эҳтиёжини тезкор қондириш, жамиятдаги долзарб муаммоларни муҳокама қилишда муҳим воситага айланиб бораётгани таъкидланди. Ушбу шароитда онлайн платформалар фойдаланувчиларининг ҳуқуқ ва қонуний манфаатларини қонун асосида аниқ мустаҳкамлаб қўйишнинг аҳамияти борасида мутахассисларнинг фикр-мулоҳазалари тингланди.
Шу муносабат билан, тадбирда иштирок этган Ахборот ва оммавий коммуникациялар агентлиги вакиллари томонидан қатор давлат ва жамоат ташкилотлари, медиа соҳаси экспертлари иштирокида соҳани тартибга солувчи тўғридан тўғри амал қиладиган яхлит қонун лойиҳаси ишлаб чиқилгани маълум қилинди.
Унда онлайн платформалар соҳасидаги амалдаги қонунчилик сезиларли либераллаштирилиб, тартибга солишдаги мавжуд бўшлиқларни бартараф этишга қаратилган қатор нормалар назарда тутилган бўлиб, уларнинг қабул қилиниши энг аввало:
- онлайн платформалар фойдаланувчилари ҳуқуқларини қонун даражасида мустаҳкамлаш;
- интернет тармоғида ахборот тарқатиш тартиблари борасида ҳуқуқий аниқлик ва изчилликни таъминлаш;
- онлайн платформалар ва веб-сайт эгалари учун Ўзбекистонда фаолият юритишнинг аниқ шартларини белгилаш, уларнинг бизнес моделлари учун шарт-шароитларни аниқ прогнозлаш имкониятини яратиш;
- ахборот соҳаси иштирокчилари, жумладан, онлайн платформалар, блогерлар, инфлюенсерлар ҳамда соҳани тартибга солувчи давлат органлари ўртасида ўзаро мулоқот ва конструктив ҳамкорлик учун ҳуқуқий асосларни такомиллаштириш;
- интернетдан фойдаланиш хавфсизлиги даражасини ошириш, болалар соғлиғига хавф солувчи ахборотлардан ҳимоя қилиш бўйича аниқ механизмларни яратиш;
- фойдаланувчилар ўз шаън ва қадр-қимматини камситувчи маълумотлардан ҳимояланиш борасида ҳуқуқий кафолатларга ва зарур ҳолларда ваколатли органнинг кўмагидан фойдаланиш имкониятини яратади.
Маълум қилинишича, қонун лойиҳасида инфлюенсер ва блогерлар масъулияти ажратилиб, блогерлар мажбуриятлари сезиларли енгиллаштирилмоқда.
Давра суҳбатида лойиҳа билан киритилаётган янги ҳуқуқий институтлар батафсил кўриб чиқилди ва уни жамоатчилик муҳокамасига қўйиш тўғрисида хулосага келинди.
Ўзбекистонда блогерлар фаолияти қандай тартибга солинади?
Айни пайтда Ўзбекистонда блогерлар фаолияти тўғридан тўғри алоҳида қонун билан эмас, балки мавжуд ахборот ва интернет соҳасидаги умумий қонунчилик асосида тартибга солинади. Жумладан, ОАВ фаолиятини тартибга солувчи “Оммавий ахборот воситалари тўғрисида”ги қонун мавжуд. Блогерлар расмий равишда ОАВ деб ҳисобланмайди, аммо улар оммага ахборот тарқатгани сабабли айрим ҳолларда ОАВларга қўйилган масъулиятлар блогерларга ҳам тааллуқли бўлиши мумкин.
“Ахборотлаштириш тўғрисида”ги қонунга биноан, интернетда ахборот тарқатаётган ҳар қандай шахс, шу жумладан, блогерлар ҳам қонунга зид бўлмаган контентни тарқатиши, шахсий ҳаёт дахлсизлигига риоя қилиши, ёлғон ёки тасдиқланмаган маълумотларни тарқатмаслиги лозим. Адлия вазирлиги, АОКА томонидан эълон қилинадиган тартиб ва кўрсатмаларда блогерлар ҳам эслатиб ўтилади.
Агар блогерлар мунтазам даромад топса (реклама, ҳомийлик ва ҳ.к.), улар солиқ тўлаш мажбуриятига ҳам эга бўлади.
Изоҳ (0)